Footer

Kakinnamayyet ti city govt iti sisterhood, addaan historical link: VM Ranches

VIGAN CITY – Kinuna ni Vice Mayor Franz Ranches a demokratiko ti konseho ditoy siudad ket denggenna ti punto ti asinoman a konsehal nga agkomento mainaig iti iseserrek daytoy a siudad iti sisterhood relationship kadagiti ili ken siudad ditoy pagilian ken iti ballasiw-taaw.

Daytoy ti imbatad ni Ranches mainaig iti naibalikas ni Konsehal Benjo Verzosa nga agbalbalin a “nalaka” ti siudad ti Vigan gapu iti iseserrekna iti sisterhood relationship kadagiti sumagmamano nga ili ken siudad ditoy pagilian ken iti ganggannaet.

“Ti punto ni Konsehal Verzosa, iti panagawatko, kayatna nga adda latta koma special link, historical link ti maysa a lugar a kakinnamayyettayo,” kinuna ni Ranches idinto nga inyunay-unayna nga awan ti problema diay Hoi An, Vietnam gapu ta adda pagpadaan ti kultura ken tradision daytoy a siudad iti Vigan kas kadagiti kadaanan a balbalay, pottery-making ken lokal a festivities a nakitada iti panagpasiarda iti nasao a pagilian idi Disiembre 2007.

Kinuna ti bise mayor a naggiddan ti Hoi An ken ti Vigan City iti pannakailistada a Unesco World Heritage sites idi Dis. 4, 1999.

Inkalintegan pay ni Ranches ti Taguig nga agbalin a sister city ti Vigan agsipud ta “paset ti Manila idi ti Taguig ket very significant ti pakasaritaan daytoy ken ti Vigan” agsipud ta ni Juan Salcedo, ti pundador ti Vigan ket apo ni Miguel Lopez de Legaspi, ti pundador ti Manila.

Innayonna pay nga iti “mismo a waterways ti Taguig ti nakasarakan ni Juan Salcedo iti love interestna”.

“Adda dokumento a mangipakita nga adda historical ties ti Vigan ken Manila a pakairamanan ti Taguig,” kinuna ni Ranches.

Kinuna ni Ranches nga iti iseserrek ti Vigan iti sisterhood agreement kadagiti sabali a luglugar, “ipakpakitana a global ti panagpampanunot ti siudad”.

“Saantayo nga ilimlimit ditoy Ilocos, ditoy Filipinas, mapantayo iti sanguanan ti Vigan ken iti sangalubongan ket maaramidtayo laeng dayta no makikammayyettayo kadagiti dadduma a pagilian,” kinuna ti bise mayor.#