Footer

Kalasag dagiti biktima ti panagdukot, pannakaitalaw

MAIYANNATUP laeng ti addang ti Korte Suprema a mangted iti nabilbileg nga instrumento dagiti pamilia dagiti biktima iti panagdukot wenno panagpukaw tapno matuntonda ti hustisia.

Babaen daytoy writ of ‘amparo’ nga ar-aramiden ti Korte Suprema, manamnama a saanton a makalusot dagiti autoridad ti turay wenno dagiti ahensia iti kadawyan a depensada nga awan iti kustodiada ti masapsapul a tao no adda petision ti pamilia ti biktima iti korte nga iruarda daytoy.

Mapaliiw ngamin a no mangidatag ti pamilia ti nagpukaw iti writ of habeas corpuz iti korte tapno maporsar ti militar a mangiparuar kenkuana, ibaga laeng dagiti opisial nga awan iti kustodiada ti masapsapul a biktima ket awan ti maaramidan ti korte no di dismisenna ti kaso.

Kas kuna ni Supreme Court Chief Justice Reynato Puno, babaen ti writ of ‘amparo’, maikkat daytoy a depensa ti militar.

Iti babaen ti writ of ‘amparo’, maikkan ti biktima iti nasaysayaat a pannakasalaknib dagiti saksina ken iti kalintegan a maipaayan kadagiti impormasion mainaig iti kasona tapno matunton ti kinapudno.

Maysa kadagiti kangrunaan a linaon ti nasao a writ ti plano a panagbalinna a retroactive wenno saklawenna wenno maiyaplikar uray kadagiti kaso a naaramid sakbay ti pannakaiparuar daytoy a paglintegan.

Kayatna a sawen, saklawenna uray kaso ni Jonas Burgos  nga agingga iti agdama ket mapukpukaw pay laeng idinto nga idi pay laeng Abril 28 a dinukot dagiti mapapati a kameng ti militar ken dagiti dadduma pay a kas kenkuana a nagpukaw lattan a kasla asuk.

Nagkamang ni Edita Burgos, ina ti mapukpukaw, iti Korte Suprema ket imbilin ti naud-udi kadagiti opisial ti AFP ken dadduma pay a militar nga ipresentada ni Jonas iti Court of Appeals.

Ngem awan ti imparang dagiti opisial ti AFP idinto nga impettengda nga awan ni Burgos iti ikutda.

Padpadaanan ngarud dagiti umili ti maipaulog a writ of ‘amparo’ tapno adda agpaay a kalasag dagiti pamilia dagiti biktima ti panagdukot ken panagpukaw a mangtunton iti pudpudno a pasamak ken no asino dagiti pudpudno a nagisayangkat iti dayta a pannakarabngis iti kalintegan iti seguridad dagiti biktima.#