Footer

Kalayaan sa Barangay Fund, pangtulong iti pannakapukaw ti insurhensia

LA UNION – Kas paset ti programana a pannakapugipog ti insurhensia iti pagilian, nangiruar ti gobierno nasional iti P2.5 billion a maited kadagiti barbarangay iti pagilian.

Agdagup iti 500 a barangay iti sibubukel a pagilian ti agbalin a benepisiario ti Kalayaan sa Barangay Fund ket umawatda iti sag-P5 milion para iti pannakaipasdek dagiti proyekto imprastruktura kas iti pasdek pagadalan, farm to market roads ken water systems a makatulong iti pannakapaksiat ti insurhensia .

Segun ken ni Col. Harold Cabreros, hepe ti Unified Forces of Northern Luzon Command, adda walopulo a depressed barangays iti Rehion I, 2,3, ken CAR a karaman a benepisario iti nasao a programa.

Kabayatanna, sinaludsod ni Regional Development Council Chairman Deogracias Victor “DV” Savellano no anian ti nagbanagan ti proyekto a kalsada iti tri-boundaries ti Nueva Era, Ilocos Norte; Cabugao, Ilocos Sur; ken Danglas, Abra idinto nga idi pay laeng napan a a tawen nga inaprobaran ni Presidente Gloria Arroyo ti pondo nga aggapu iti Kalayaan sa Barangay Fund.

Insungbat ni Maj. Gen. Isagani Cachuela, hepe ti Northern Luzon Command, a gagangay a naladaw a maruk-atan dagiti pondo gapu iti dalanen a proseso.

Kinuna ni Cachuela nga ita pay laeng a mairuar ti pondo dagiti proyekto iti 2006.#