Footer

Kalidad abel Iloko, naipaganetget

VIGAN CITY – Impaganetget ti dadaulo ti ahensia a maseknan iti panaglako ken industria iti probinsia ti pannakapasayaat ti kalidad dagiti abel Iloko tapno makibalubalda iti global market.

Kinuna ni Department of Trade and Industry provincial officer Grace Lapastura a napateg ti  abel ditoy probinsia agsipud ta maysa daytoy kadagiti produkto a pakabigbigan ti Ilocos Sur ket rumbeng laeng a mapapigsa daytoy nga industria.

Ti panagabel ti maysa kadagiti industria a natawid dagiti Ilokano ken maysa kadagiti pagsapulan dagiti residente iti Vigan, Caoayan, San Juan, Santa ken dagiti dadduma pay nga ili nga agab-abel.

Iti agdama, maysan ti abel Iloko kadagiti paborito a gatangen dagiti turista kas pakalaglagipanda iti panagpasiarda ditoy siudad.

Tapno maidur-as daytoy nga industria,  inangay ti DTI ti seminar workshop mainaig iti Abel development program   nga inatenderan  dagiti loom weavers ditoy probinsia itay nabiit iti Vigan Culture and Trade Center .

Kinuna ti provincial officer nga iti kallabes, maar-aramid laeng dagiti abel nga ules, punda ti pungan, abbong ti lamisaan ken tualia ngem iti pannakapapintas ti kalidad daytoy a produkto, mabalinen a maikumpara kadagiti sabali pay a klase ti tela ket madaiten daytoy iti aniaman a kita ti  gown, barong, casual dress, uniforms, bags, shawls ken dadduma pay.

Nadakamatna pay nga addan dagiti pagadalan nga abel ti us-usaren nga uniporme dagiti mangisursuroda.

Iti napalpalabas, impromot ni Governor Deogracias Victor “DV” Savellano ti abel Iloko babaen ti panagaramatna iti Abel Iloko polo ken barong   ken pannakaitandudo daytoy iti fashion show nga inatenderan dagiti international beauty queens ken iti tinawen a Viva Vigan Festival.

Bayat ti seminar, napagnunummuan dagiti loomweavers   dagiti pagallagadanda iti panagabelan para iti pannakapasayaat ti kalidad ti Abel Iluko tapno  makibinnalubalda iti global market.#