sinursuran-banner-sqSinursuranNi Jobert M. Pacnis

Kalpasan ti Eleksion, Ania…?

Sinursuran:  Kolum ni Jobert M. Pacnis

(Maikadua a paset)

 

 

Iti Tanap, naglatak kadagiti dadduma a politiko dayta ‚Äúpanangipatakderda iti buying station.‚Ä̬† No dim‚Äô anagem a naimbag, ipatom la ketdi a mais wenno palay buying station ti sasawenda. Siempre, iti ania man a negosio, masapulda ti dakkel a kapital. Ket mabalin pay a kunaem nga adu la ketdi ti matulonganda nga umili ta saan met nga asi-asi ti tao a masapul iti buying station a negosio.

Ngem daytoy a buying station, literal a panaggatang met laeng ti kayatna a sawen. Laeng, saan a mais wenno irik ti magatang. Ania ngarud?

Ti sagrado a botos ti tunggal umili!

Pagaammotayo nga addada dagiti grupo iti gimong a no ania ti ibaga dagiti liderda, isu ti masurot, ti  ibotosda. Ket tapno maalam ti suporta dagitoy, masapul nga armem dagiti liderda.

Nakakaskas-ang a panunoten ti kinaagpayso a mapaspasamak. Idi, mapili, masagat iti yakayakan dagiti masuportaran uray awan ti maipasukib. Kitaenda a talaga ti track record ti maysa a papili sakbay a yetnagda ti suporta kadaytoy. Saanda a suportaran dagiti managbisio ken namsek iti immoralidad ti biag/kabibiagna. Ngem itan, no asino ti highest bidder, isu ti makaala iti suporta a surotento met dagiti rinibu a kamengda.

Ania ngarud ita ti pagbanagan ti nakayanakan no kasta nga agtakem dagiti awan man laeng ti ammona iti basic a mapaspasamak iti pagpandayan ti linteg (uray kunaen nga iti agpang munisipalidad wenno probinsial laeng)?¬† Kamengto laeng ti silent committee (wen, aduda ti kakastoy)? Wenno aktibo iti binnotosan ti ‚Äúyes‚ÄĚ or ‚Äúno‚ÄĚ?

Maibilang a sagrado ti tunggal botos. Ket addaan ti tunggal maysa iti agpapada a tiansa a mamagbaliw iti ilina. Kunada ngarud nga iti eleksion, awan ti nangato, awan ti nababa. Agpapatas. Saan koma ngarud a padiktaran no asino ti pilienna a mangituray kenkuana. Siwawayawaya koma a mangikur-it iti namnamaenna nga addaan iti kabaelan a mangitag-ay iti pagilian.

Ala, nalpasen ti eleksion, kas nasao itayen. Panawenen nga agasan dagiti sugat a naparnuay iti kallabes. Makikappia kadagiti nakaapa‚ÄĒ kaarruba man wenno iti social media. Kitaen no ania ti maitulong kadagiti sumaruno nga agturay (sulasu man wenno saan).

Inanamaentayo ti panagbalbaliw a dumteng iti pagiliantayo. Change is coming, ta dayta man ti kari ti baro a presidente. Kas kuna dagiti eksperto, daytoy ti maysa a nangpadawyanna kadagiti botante. Ta, wen, am-amang pay, aya, a kayattayo ti panagbalbaliw iti sistema ti gobierno? Ta am-amang pay a kayattayo a maikkat ti korupsion ken dagiti ilegal nga aramid aglalo ti panagraira ti maiparit nga agas a mangiluod iti tunggal biktima‚ÄĒ karamanen ti pamilia a nagtaudanna.

Am-ammo ngamin ni President elect Rodrigo Duterte nga addaan iti sangi a mangipatpatungpal kadagiti ammona a pagimbagan ti sapasap nupay nabalkot iti kontrabersia gapu iti kinabulgarna nga agsao. Nasurattayon iti kallabes no kasano nga impanna iti mapa ti lubong ti siudad ti Davao a nagtakemanna a mayor iti naunday a panawen.

Change is coming. Iti maysa nga interbiu ken ni Duterte, kunana a masapul nga adda madadaan a pagsupli dagiti drayber iti pampubliko a lugan. Saan nga agbalin kenkuana a di maited ti supli (change) dagiti pasahero. Pananggundaway kano dayta.

Sapay koma ta kasta met kadagiti dadduma nga ahensia ti gobierno. Ditoy Tanap, addada opisina ti Land Transportation Office a kanayon nga awan pagsuplida. Saan laeng nga iti bigbigat, uray pay aldawen wenno leppas ti pangngaldaw. Ipakitada pay, wen, ti alud ti lamisaanda a talaga nga awan ti babassit a kantidad a pagsuplida (ta irantada met nga idulin dagitoy). Maminsanto kanon nga alaem ti suplim.

Ngem kaanonto ngarud manen ti panagsublim iti opisinada? Inton ag-renew-ka, a! Ngem kuidaw no annugotendanto pay nga adda dida naited a suplim idi. Change is coming-to ngarud koma metten kadagiti maseknan nga ahensia (saan laeng a ti nadakamat).

Wen, nalpasen ti eleksion. Ngem dina kayat a sawen nga agpatingga metten ti pannakibiangtayo kadagiti mapaspasamak iti ilitayo. Agbalintayo latta koma a naridam a mangsiput no an-annongen met laeng dagiti agturay ti akemda kas lidertayo. Ad-adda ket koma nga aktibotayo ita ta addada manen baro a mangtimon iti turay.

Change is coming, kuna ni Duterte. Kunatayo koma ngarud: mangrugi met kaniak dayta a panagbalbaliw para iti pagimbagan ti sapasap. ‚ÄĒ#