Kaluklukat a municipal e-Library, pagnanaaranen

CABUGAO, Ilocos Sur – Pagnanaaranen dagiti agindeg ditoy nga ili nangruna dagiti estudiante, mangisursuro, dagiti agsuksukisok ken dadduma pay nga agkasapulan iti serbisio ti internet ti nabiit pay a naluktan a Municipal e-Library.

Naluktan idi Hunio 3, 2014, moderno a kompiuter dagiti naikabil iti e-Library nga usaren dagiti aginternet ket silulukat daytoy manipud iti 8:00 a.m. agingga iti 5:00 p.m. manipud Lunes agingga iti Biernes ken 1:00 pm agingga iti 5:00 pm iti Sabado ken Domingo.

Kanaig daytoy, naigunamgunam kadagiti aginternet iti panagtungpalda kadagiti annuroten kas iti saan a pannakaaramat dagiti computer para iti panaglukat iti Facebook, Twitter, Instagram ken dadduma pay a social network sites, Youtube, on line games ken pornography sites.

Maipalagip a naipasdek ti e-Library babaen ti pondo a naukkon manipud iti Global Grand Reunion 2014.

Ti lokal a gobierno ti Cabugao iti panangidaulo ni Mayor Edgardo S. Cobangbang, Jr. ti nagsangaili iti nasao a pasken a tinabunuan dagiti annak daytoy nga ili nga adda iti ballasiw-taaw.#