Kamatis dagiti mannalon, dagus a mabayadan: manedier ti tomato paste plant

SANTA, Ilocos Sur – Dagus a mabayadan dagiti kamatis nga ilako dagiti mannalon iti tomato paste plant.

Daytoy ti impasingked ni Madelyn Arce, mangtartarawidwid iti Ilocos Sur  Tomato Paste Plant bayat ti pannakaiwaras dagiti motorsiklo kadagiti teknisian daytoy a planta.

Sangapulo ket uppat a motorsiklo ti inyawat da Gob. Luis “Chavit” Singson ken Bise Gob. DV Savellano kadagiti teknisian  ti Ilocos Sur Tomato Paste Plant itoy nga ili idi Disiembre 15 tapno adda usarenda a tumulong kadagiti mannalon mainaig iti panagmulada iti kamatis.

Kinuna ni Madelyn Arce a napagnummuan ti planta ken dagiti teknisian nga ibaklay dagitoy ti 80% ti kadagupan a bayad ti motorsiklo gapu ta agbalinto a personal a kukuada ti lugan idinto a bayadan ti planta ti 20% gapu ta mausar dagitoy no mapanda agmonitor kadagiti barbarangay.

“Binulanto a maikissay iti sueldoda daydiay 80% agingga a matulodanda ti motorsiklo,” impalawag ni Arce.

Babaen ti pannakaiwaras ti motorsiklo, nalaklaka a dumanon dagiti teknisian kadagiti kataltalonan tapno makitada no ipakpakat met laeng dagiti mannalon dagiti teknolohia tapno napimpintas ti kalidad dagiti maapit a kamatis a maiserrek tapno maproseso iti planta, kasta met a makapatangda pay dagiti dadduma a mannalon tapno allukoyenda  ida nga agmula iti kamatis yantangay mabayadanen a dagus dagiti mulada apaman a maiserrek iti planta.

Kabayatanna, paisagsagana metten ti gobernador ti programa para iti Multiline Food Processing Plant nga adda laeng iti abay ti tomato paste plant. Kayat ni Singson nga aggatang ti nasao a planta kadagiti dingo, nateng ken high value commercial crops dagiti umili tapno maproseso iti nadakamat a planta.

Impasingked ni Singson nga apaman a masimpa amin a kasapulan ti planta, sumaruno a mairugi ti operasion daytoy.#