Footer

Kameng ti Army, dimmanog, nagpaturong iti paltog

CANDON CITY.  Dandani nagiinnala dagiti pannakabagi ti linteg ditoy ken maysa a kameng ti Philippine Army idi nagkedked  ti naud-udi a sumurot iti police station kalpasan a dinanogna ti maysa a drayber iti terminal ti minibus ditoy.

Nabigbig ti soldado a ni SSG Diosdado Javillonar, residente iti Sagat, Santa Cruz, Ilocos Sur, naka-assigned iti DND Camp Aguinaldo ngem agdama a nakabase iti RDCC, La Union.

Naipan iti Resonable Hospital ni  Ricardo Garcia, 29, drayber iti minibus, ken residente iti Bulag Centro, Bantay, Ilocos Sur tapno mataming ti nadanog a kannigid nga abagana.

Segun iti report, kaiparparking ti biktima ti luganna a minibus iti Stern Mall Terminal idi simmangpet ni Javillonar ket inuksot daytoy ti paltogna a kalibre 45, sana dinanog ti biktima. Mapapati a  pinaturongan ken binutbuteng ti soldado a paltogan ti biktima.

Naammuan iti inbestigasion a pinabasol ti soldado a reckless driver ti biktima ngem pinaglibakan daytoy ket kinunana a  naggapu iti amianan a direksion idinto a naggapu iti abagatan ti soldado.

Inimbitaran dagiti nagresponde a polis ditoy ti army man iti estasion tapno aglinnawagda iti biktima ngem mapapati a nagkedked ti soldado.

Nagsagana dagiti polis idi iyawat ti soldado ti paltogna a nakakaut ti ramayna iti gatilio.

Dagus a siniggawat ni COP Col. Rey de Peralta ti armas ti soldado a cal. 45, serial no. 731914, nga addaan iti magasin a nagkarga iti bala.

Napalubosan met laeng ni Javillonar kalpasan a nagkedked ti drayber ti minibus nga agipila iti darum. #