Footer

Kameng ti barangay fire brigade, natnag iti drug operation

MAGSINGAL, Ilocos Sur – Pinalab-ogan dagiti nagtitipon nga elemento ti kapolisan daytoy kabarbaro a drug personality idi malem ti Agosto 10 a nagtungpal iti pannakaarestona.

Nabigbig ti suspek a naikappeng iti fire brigade ti Bureau of Fire Protection ditoy nga ili a maysa nga Edwin Sarmiento y De Guzman, 37, naasawaan, ken residente iti Barangay San Vicente.

Karaman dagiti nangiwayat iti buy bust drug operation maikontra ken ni Sarmiento dagiti elemento ti PDEA Region 1, PDEU Ilocos Sur PPO, PIB ken Magsingal police station.

Nakakumpiska dagiti operatiba iti ikut ni Sarmiento iti tallo a bassit a heat sealed sachet a nagkarga iti mapapati a shabu, 3 a bassit a plastic sachet a nagkarga iti mapapati a shabu residue, buy bust money, ken dua a sabali pay a tig-P500.00, maysa a lighter ken wallet a naglaon iti nadumaduma nga identification.

Naipan ti suspek ken dagiti ebidensia iti police station ditoy para iti dokumentation sakbay ti pannakaipila ti maitutop a kaso a panaglabsing iti RA 9165. Naipatulod met dagiti nakumpiska nga ebidensia iti PCLO para iti pannakaamirisda. (Tawid News)