VIGAN CITY – Maysa a milion ti maipautang kadagiti kameng ti maysa a gunglo dagiti agnaed iti upland municipalities.

Daytoy ti inkari ni Ilocos Sur Governor Deogracias Victor “DV” Savellano kadagiti tallopulo a chapters ti Budong Indigenous Allied Group (BIAG)  bayat ti naangay a taripnong ti agdua gasut a miembro daytoy a gunglo iti kapitolio idi Mayo 29 kas paset  ti livelihood projects para kadagiti taga-upland towns iti probinsia.

Kinuna ni Savellano a maited ti pondo iti Nueva Segovia Consortium of Cooperatives tapno isuda ti mangmonitor ken mangpataray iti daytoy.

Innayon ti gobernador a makipatang iti NSCC tapno agbalin nga special case ti pautang  a maited kadagiti  kameng ti BIAG iti tiempo ti panagmula ken sada la agbayad inton makaapitdan saan a kas iti polisia ti NSCC a linawas ti amortisasion.

Dinawat pay ni Savellano kadagiti nakitaripnong a dagiti koma agduduma a produktoda iti lugarda ti ipangrunada a papintasen ken paaduen idinto nga impatalgedna a sisasagana a tumulong para iti pannakailako kadagitoy.

Kanaig daytoy, indagadag ti gobernador iti panangpaadu nga umuna dagiti agnaed iti upland municipalities kadagiti produktoda imbes a pannakapapintas ti kalsada ken barangay hall iti lugarda ti dawatenda.

“Awan serbi ti napintas a dalan no awan met idalanmo nga apit,” kinuna ni Savellano.#