Footer

Kamkameng ti media, nangisayangkat iti indignation rally mainaig iti media killings

LAOAG CITY – Kas pannakipagriknada iti radio broadcaster a napapatay itay nabiit, nangisayangkat dagiti kameng ti media ditoy iti indignation rally idinto nga indagadagda ti pannakaited iti hustisia iti biktima.

Indauluan ti Media Active in Ilocos Norte ken ti Kapisanan ng mga Brodkaster ng Pilipinas ti nasao a rali nga inangayda iti kapitolio ditoy a nangkodenaranda kadagiti media killings ditoy probinsia a pakaibilangan ti pannakapapatay da Jovelito Agustin ti Aksiyon Radyo, Roger Mariano ken Andy Acosta.

Napaltogan ni Agustin bayat ti panaggawidda, kaduana ti kaanakanna a ni Joseph Agustin, 22, iti national highway a sakup ti Barangay Barit ditoy met laeng siudad iti agarup 9:45 ti rabii ti Hunio 16.

Segun iti inisial nga inbestigasion dagiti polis, sinurot dagiti suspek a nakalugan iti motorsiklo ti lugan ni Agustin ket idi addadan iti nadakamat a barangay, linabsan ida dagiti suspek sada pinaputokan iti sumagmamano a daras ti broadcaster.

Naitaray ni Agusin iti Governor Roque Ablan, Sr. Memorial Hospital ditoy siudad ngem pimmusay iti agarup 1:15 a.m.

Saan a naan-ano ti kaanakan ti biktima.

Nakarekobre dagiti inbestigador iti uppat a kapsula ken dua a buli manipud iti .45 pistol iti nakapasamakan ti krimen.

Sakbay ti pammapatay, naparakapak ti pagtaengan ti biktima idi Mayo 7.

Kabayatanna, iti interbiona iti media iti Ilocos Sur, impalgak ni Regional Director Police Chief Supt. Constante D. Azares, Jr., a nabigbigen ti triggerman  ken ti mapapati a mastermind iti  pannakapapatay ken ni Agustin.

Nupay kasta, saan pay nga impalgak ni Azares ti kinasiasino ti triggerman kabayatan ti manhunt operation nga isaysayangkat dagiti polis ken pannakaipila ti kaso maikontra iti suspek.

Kanaig daytoy, maysa a task force ti binuangay ti polis ti Ilocos Norte a mangisayangkat iti naun-uneg nga inbestigasion iti pannakapapatay ni Agustin.

Dinesignaran ni Ilocos Norte provincial director Police Senior Supt. Ulysses Abellera Police Supt. Bienvenido C. Rayco, Jr., deputy for operations, a mangidaulo iti Special Task Group (SITG) “Agustin”.

Nangiparada pay dagiti kameng ti media iti lungon iti sanguanan ti Philippine National Red Cross kas pammabalawda iti nabayag a pannakaited iti dara a kasapulan ni Agustin para iti operasionna.

Iti sanguanan ti kapitolio, indagadag ti grupo ti pannakaisardengen ti pannakapapatay dagiti kameng ti media ken iti madagdagus a pannakaited ti hustisia ken ni Agustin.#