Kampania kontra illegal a sugal iti Ilocos Sur, mapaingetan

BANTAY, Ilocos Sur β€” Mapaingetan ti kampania ti Philippine National Police kontra illegal a sugal iti intero nga Ilocos Sur ken Region I kas panagtungpal iti direktiba ni Presidente Rodrigo Duterte ken PNP Chief General Archie Francisco Gamboa a mangpasardeng kadagiti nagduduma nga illegal a sugal iti pagilian gapu iti dakes nga epektona iti kagimongan.

Dayta ti kangrunaan a natratar kabayatan ti press conference a naangay sadiay Makatarungan Hall ti Ilocos Sur Sur Police Provincial Office, Camp President Elpidio Quirino iti daytoy nga ili. Indauluan ti presscon ni Police Colonel Emmanuelle Reyes, ISPPO Officer-In-Charge ken dadduma pay a police officials pakairamanan ni Police Major Melenium Bantas, hepe ti PNP Criminal Investigation and Detection Group iti Ilocos Sur.

Nairakurak a mapaingetan ti kampania kontra illegal a sugal kas kadagiti illegal a pallot, mahjong, baraha wenno innipis ken dadduma pay a klase ti ay-ayam nga addaan iti kuarta pusta. Naammuan a mapaingetan metten ti pannakaipawil ti panagsusugal kadagiti pakaimassayagan dagiti natay nga iti naglabas ket naik-ikkanda iti konsiderasion.

Mapainget pay ti pannakaipawil dagiti tupada wenno illegal a pallot ken pannakaiwayat dagiti sugal a dado kadagiti arubayan dagiti lehitimo a galiera, ken uray dagiti dadduma a paay-ayam kadagiti periaan wenno piestaan kas ti drop ball ken dadduma pay a kasapulanna ti pusta a kuarta.

Maiwayat ti aktibo nga anti-illegal gambling operations kas panagtunpal iti nainget a bilin ti PNP National Headquarters nga inyallawat ti PNP Region 1 Police Office iti liderato ti Regional Director a ni Brig, Gen. Joel OrduΓ±a.

Naammuan a naimandaren kadagiti amin a police stations ti pannakapainget ti kampania kontra illegal a sugal ket naibilin ti panangparegtada kadagiti operasionda kadagiti masakupanda a lugar.

Impakaammo met dagiti kameng ti PNP CIDG Ilocos Sur a mainayon kadagiti dadduma nga akemda kontra krimen, ket agiwayatda pay iti anti-illegal gambling operations, ken impasingkedda ti pannakasurot ti umno a proseso tapno maliklikan ti panagabuso.

Iti mainaig a damag, agtultuloy ti nainget nga internal cleansing ti PNP pakairamanan dagiti polis a nakadestino iti ISPPO. Naangay ti ISPPO workshop iti Cascading / Orientation on the Enhanced Revitalized PNP Internal Cleansing Strategy kas naipalaon iti PNP Memorandum Circular 2019-027. Inatenderan daytoy dagiti Police Executive Senior Police Officers kadagiti nagduduma a police stations, ken dagiti pastor ti grupo a Bless our Cops-Ilocos. Nayadal kadakuada dagiti akem ken pagannurotan ti sistema. Panggep ti PNP internal cleansing program a pasayaaten ken pasingeden ti panagkaykaysa dagiti polis iti pannakaipakat dagiti reporma babaen ti pannakapainget ti disiplina ken dagiti naespirituan ken moral a tagipatgen tapno agbalinda a nalinteg kadagiti sinapataanda nga akem nga agserbi ken mangsaluad kadagiti umili. ●