Kampania kontra mailaklako nga illegal a paputok, napaingetan

SAN FERNANDO CITY – Tapno mapabassit ti bilang dagiti biktima iti paputok, pinaingetan ti Department of Health iti Region 1 ti kampaniana maikontra iti panagraira dagiti illegal a paputok iti panangselebrar iti Baro a Tawen.

Kinuna ni DOH-1 Regional Director Myrna C. Cabotaje nga inwayatda ti naing-inget pay a kampania tapno saan laeng a mapabassit dagiti mabiktima iti paputok iti rehion no di pay tapno maikkat daytoy iti listaan a kaaduan iti biktima dagiti paputok iti sapasap a pagilian.

Maipalagip a nupay bimmassit ti bilang dagiti biktima iti paputok iti rehion idi selebrasion ti Paskua ken baro a tawen idi 2015-2016, karaman latta daytoy iti listaan ti top ten.

Ti Region 1 ti maikatlo a kangatuan iti biktima iti paputok, sarsarunuenna ti National Capital Region ken ti Region VI.

Kas maibatay iti Iwas Paputok Surveillance Report ti DOH-1, manipud idi Disiembre 21 agingga iti Disiembre 27, addan nakarekord a 28 nga insidente ti nabtakan iti paputok nupay nababbaba daytoy ngem iti 70 a kaso a nairekord iti isu met la a tiempo idi napalabas a tawen.

Iti kadagupan a 28 firecracker-related incidents a nairekord iti Region 1 manipud iti Disiembre 21-27, 2016, siam a kaso ti biktima iti boga; 9 iti piccolo; 2 iti five star firecracker; saggaysa ti baby rocket, kwitis, whistle bomb ken Yakult-inspired firecracker, idinto nga 4 ti nagbalin a biktima iti saan nga ammo a paputok.

Kaadduan ti biktima ti paputok iti Pangasinan (18), La Union (5), Ilocos Sur (3) ken Ilocos Norte (2).

Kanaig daytoy, nagapela ni Cabotaje iti kapolisan a doblienda pay ti kinaingetda maikontra iti pannakailako dagiti maiparparit a paputok agsipud ta manamnama iti yaadu dagiti insidente dagiti mabtakan iti paputok nangruna iti panangsarabo iti Baro a Tawen.

Kinuna ni Cabotaje a naikkan iti autoridad ti kapolisan a mangtiliw kadagiti negosiante nga aglaklako iti illegal a paputok.

Segun iti Republic Act 7183, wenno an Act Regulating the Sale, Manufacture, and Use of Firecrackers and other Pyrotechnic Devices, dagiti sumaganad dagiti kangrunaan a maiparit a mailako a paputok: Pla Pla, Atomic Bomb, Goodbye Philippines, Hello Columbia, Piccolo, ken Super Lolo.

Inraman pay ni Cabotaje ti pannakaiparit ti pannakailako ti boga agsipud ta daytoy ti napaliiw a gapu ti kaadduan ti nadunor iti pannakaselebrar ti Paskua.

Kabayatanna, nakiddaw iti polis ken ti Bureau of Fire Protection (BFP) a tumulongda iti pannakaidispley dagiti paputok kadagiti bakante a lote nga adayo kadagiti kabalbalayan tapno malapdan ti mapasamak nga uram.#