Footer

Kampania ti Vigan a mairaman a finalist iti 7NewWonders Cities, umad-adu dagiti mangsuporta

VIGAN CITY – Pumigpigsa dagiti tignay a mangsuporta iti kampania dagiti agtuturay iti daytoy a siudad a mairaman ti Vigan City a maysa kadagiti finalists iti New 7 Wonders-Cities iti sangalubongan.

Kas pannuportana iti daytoy a kampania dagiti agtuturay iti siudad ti Vigan, nangipasa ti sangguniang panlalawigan iti maysa a resolusion a mangidagdagadag kadagiti amin a residente iti Ilocos Sur a mangibutos iti Vigan City a maysa a finalist iti New 7 Wonders-Cities.

Kinuna ni Vice Governor Deogracias Victor Savellano a dakkel a dayaw ti probinsia no mapili ti Vigan City a maysa kadagiti pito a pagsidsiddaawan a siudad iti sangalubongan ket kasapulan ti panangiduronda kadagiti promosional nga aktibidad ken aktual a panagbutosda tapno maragpat ti Vigan City ti maysa a puesto iti top 7.

Kanaig daytoy, tinawagan ti bise gobernador amin dagiti barangay captain iti probinsia a mangbuangay kadagiti voting centers iti bukodda a barangay hall ket allukoyenda dagiti kalugaranda nangruna dagiti addaan computer ken laptop tapno ibutosda ti Vigan City a maysa kadagiti pito a wonder cities iti global voting site ti New7Wonders.

Indagadag pay ni Savellano kadagiti computer shop owners ti panangipalubosda iti libre a panaginternet dagiti bumarangay iti maysa nga oras kada aldaw ken panangasistirda kadakuada a mangibutos iti Vigan City a finalist iti New 7 Wonders-Cities.

Iti naangay a general assembly ken eleksion dagiti Supreme Council Trustees a naangay iti Amoranto Stadium idi Mayo 25, inlungalong ni Bokal Jeremias Singson ti panangsuporta dagiti Knights of Rizal iti kampania ti Vigan City a mairaman a finalist iti 7 New Wonders-Cities.

Kinuna ni Singson, kapilpili a Supreme Commander iti Order of the Knights of Rizal (OKOR) a rumbeng laeng a suportaran dagiti amin nga umili ti kampania ti Vigan City a mairaman iti 7NewWonders Cities agsipud ta isu laengen ti nabatbati a mangibayog iti pagilian.

Dakkel a pakaidayawan ken pakaidur-asan ti ekonomia ken turismo ti pagilian no mapili ti Vigan City a maysa kadagiti 7 New Wonders-Cities, kinuna ni Singson.

Sakbay daytoy, inrusat ni Mayor Eva Marie Singson-Medina ti napingpinget pay a kampania tapno mairaman ti Vigan City a maysa kadagiti pito a pagsidsiddaawan a siudad iti sangalubongan idi rinambakan ti siudad ti Viva Vigan Festival of the Arts idi Mayo.
Inyussuat daytoy da Medina tapno ad-adda pay a mapapigsa ti kampania ti Vigan City a mairaman a maysa kadagiti finalists para iti New 7 Wonders-Cities kadagiti maudin a paset ti pasalip nga agtunged inton Disiembre 7 daytoy a tawen.

Kabayatanna, umad-adu dagiti nangikari iti suportada iti daytoy a kampania dagiti agtuturay iti Vigan City a mairaman ti siudad iti pito a wonder cities iti lubong.

Itay nabiit, bayat ti courtesy call dagiti opisial ti Philippine Medical Association iti city hall kalpasan ti konbensionda a naangay iti Vigan City, impasiguradoda ti suportada iti kampania ti Vigan City a mairaman a maysa kadagiti pito a finalists iti New 7 Wonders Cities of the World.

Dinaydayaw pay dagiti partisipante iti nasao a konbension ti kinaisalsalumina ti Vigan City ken iti kinamanagsangaili dagiti agtuturay nga indauluan ni Mayor Medina.

Iti sabali a bangir, imposte ti Agoo PNP iti Facebook ti panangibitinda kadagiti tarpaulin kas advertisement ken promosional a suportada iti kampania ti Vigan City a mairaman iti New 7 Wonders-Cities of the World.

Mapili dagiti finalists iti nasao a kampania babaen iti panagbutos dagiti tattao iti amin a paset ti lubong iti global voting site ti New 7 Wonders Cities of the World.

Manipud iti top 28, maipabassit inton Hulio 7 dagiti finalists tapno agbalinto laengen a 21 a siudad ti agabante para iti sumaruno a phase.

Maipabassit manen ti bilang dagiti finalists tapno agbalin laengen a 14 inton Oktubre 7.

Manipud ditoy, mapili dagiti pito a siudad inton Disiembre 7 a pakaipaayan ti pammadayaw a 7 New Wonders Cities.

Kinuna ni Eamonn Fitzgerald, Head of Communications for New7Wonders, a kas kapadasanda iti napalabas, “adu ti mapasamak a panagbalbaliw” idinto nga innayonna nga iti udina, “ti pigsa ken creativity ti kampania tunggal siudad ti mangitunda no ania dagiti mangabak wenno maabak.”

Dagiti sumaganad dagiti 28 nga opisial a finalists (alphabetical order) iti New7Wonders Cities campaign: Athens, Greece; Bangkok, Thailand; Barcelona, Spain; Beirut, Lebanon; Casablanca, Morocco; Chicago, USA; Doha, Qatar; Durban, South Africa; Havana, Cuba; Ho Chi Minh City, Viet Nam; Istanbul, Turkey; Kuala Lumpur, Malaysia; Kyoto, Japan; La Paz, Bolivia; London, United Kingdom; Mendoza, Argentina; Mexico City, Mexico; Mumbai, India; Perth, Australia; Phnom Penh, Cambodia; Prague, the Czech Republic; Quito, Ecuador; Reykjavik, Iceland; St. Petersburg, Russia; Seoul, South Korea; Shenzhen, China; Vancouver, Canada, ken Vigan, Philippines.#