Footer

Kampion manen ti NCR iti Palarong Pambansa iti maika-14 a gundaway

VIGAN CITY – SAANDA laeng a nagpannuray dagiti atleta ken intero a delegasion ti National Capital Region iti bukodda a pigsa ken kabaelan tapno agtalinaedda a kampion iti maika-14 a gundaway iti Palarong Pambansa, ngem nagtaklinda pay iti Dios.

Dayta ti impaduyakyak dagiti atleta ken opisial ti NCR wenno Metro Manila tapno magun-odda manen ti kampionato iti maika-14 a gundaway iti kaudian a naangay a Palarong Pambansa iti Ilocos Sur idi Abril 14 – 21, 2018.

Iti kadagupan dagiti 17 a rehion a nagsasalip iti Palarong Pambansa, nagtalinaed ti NCR nga overall champion iti torneo maibasar iti medal tally babaen ti pannakagun-odda iti 100 a gold medals, 70 a silver medals, ken 50 a bronze medal. Maikadua met iti overall medal standing ti Region IV – A, Southern Tagalog wenno Calabarzon Region a nakagun-od iti 55 a gold medals, 70 a silver medals, ken 73 a bronze medal. Maikatlo met ti Region VI wenno Western Visayas a nakagun-od iti 26 a gold medals, 25 a silver medals, ken 36 a bronze medal.

Kas kadagiti naglabas a Palarong Pambansa, dinominaran ti NCR iti kaaduan dagiti nasurok a 30 nga sports events aglalo dagiti individual events kas ti swimming, table tennis ke gymnastics. Kampeon da met iti basketball. Impakita dagiti student-atlete ti NCR ti laing ken disiplinada iti nadumaduma nga ay-ayam. Impaneknek met dagiti opisial iti NCR ti nalaus a suportada kadagiti atletada iti panagsanay dagiti atleta, ken preparasionda sakbay ken kabayatan ti panagay-ayam dagiti atleta.

Napaliiw dagiti kameng ti media a kabayatan ti opening day ti Palarong Pambansa a basbassit nga amang dagiti delegasion ti NCR a nakipaset iti napaut a parada iti Bantay ken Vigan manipud pangaldaw, ken programa agingga iti sumipnget. Nadlaw nga adu kadagiti atleta ti NCR ket saanda a nakipaset iti parada ken programa a mapapati nga agin-inana ken agsagsaganadan para iti pannakisalisalda, kabayatan a dagiti atleta iti nagduduma a rehion ket nagkapkapudotan ken nagbanbannogda iti opening parade and program.

Saan nga ammo ti kaaduan a kalaksidan nga iti NCR iti ayan dagiti kadadakkelan nga eskuela, ket aglaplapusanan pay ti suporta dagiti DepEd official ken pamilia dagiti atleta iti napaut a panagsanay, napintas nga estratehia ti NCR Team, ket napakuyogan pay daytoy iti natibker a pammati iti Dios dagiti kameng ti team.

Ipaneknek daytoy ti masansan a kaadda a pannakimisa ken panagkararag dagiti atleta ti NCR iti simbaan wenno sanktuario ni Santo Cristo Milagroso wenno simbaan ti Parokia ni San Nicolas de Tolentino iti Sinait nga idauluan ni Rev. Fr. Lovell Soller, Kura Paroko, ken Rev. Fr. Angelito Degracia, Parochial Vicar. Minalem met dagiti naangay a Misa iti Sinait National High School a nagnaedan dagiti delegado ti NCR.

Napagnaed dagiti dadduma nga atleta ti NCR sadiay Sinait National High School ken dadduma pay nga eskuela. Dagiti dadduma a player ket nagnaeddan kadagiti hotel. Naragsakan dagiti kameng ti NCR Team idi maammuanda a maibilang a pilgrimage site ti simbaan sadiay Sinait nga ar-araken dagiti adu a deboto gapu iti nangisit nga imahe ni Santo Cristo Milagroso, ket adu kadakuada dagiti nagbalin a deboto kabayatan ti makalawas a torneo.

Kas ti karungbo ti opening ceremony a dinar-ayan ni Presidente Rodrigo Duterte, naindaklan met laeng ti closing ceremony ti Palarong Pambansa. Indauluan da Governor Ryan Singson, Vice Gov. Jeremias Singson ken Department of Education Undersecretary Tonisito Umali dagiti opisial ti gobierno kabayatan ti pannakaangay ti closing ceremony iti Quirino Stadium, Bantay, Ilocos Sur idi malem ti Abril 21, 2018. Nagparada manen dagiti atleta ken delegado ti 17 a rehion. Nagpaay a kangrunaan a sangaili ni Makati Representative Monsour del Rosario, sigud a Taekwando Olympian, gold medalist iti South East Asian Games ken medalist iti Asian Games.

Naragsakan dagiti nakauman ti media a taga-Ilocos Region ta uray no maika-11 laeng ti Region I iti overall standing iti kaudian a Palarong Pambansa ket ngimmato manipud iti maika-13 a puestoda idi 2017 sadiay Buenavista, Antique.  Mangnamnamada a kadagiti masungad a Palarong Pambansa ket ngumatonto pay ti medal standing ti Region I babaen ti pannakaparegta dagiti sports programs dagiti uppat a probinsia. Maangayto ti Palarong Pambansa 2019 sadiay Davao City ta isuda ti nangabak iti bidding. Naisapsapa ti bidding tapno makapagsagana nga agsangaili para iti sumaruno a Palarong Pambansa.

Maayatan met dagiti taga-Ilocos Sur iti pannakaangay ti Palarong Pambansa iti probinsia ta binigbig ken pinagyamanan daytoy ti DepEd ti nasayaat a panagsagana ti Regional Office, Provincial Government ken dadduma pay a maseknan nga ahensia ti gobierno ken ti pribado a sektor. Kalaksidan ti pannakaitandudo ti sports, ket naparegta pay ti turismo ken industria iti probinsia. Napapintas pay dagiti school buildings ken playing venues gapu iti Palarong Pambansa.

Dinayaw ken pinagyamanan met dagiti atleta ken delegado dagiti taga-Ilocos Sur iti kinamanagsangaili dagiti Ilokano gapu ti kinasayaat ti pannakatrato ken pannakapasangbayda kabayatan ti makalawas a torneo. Impeksa met ti DepEd ken Provincial Government ti panagyamanda kadagiti amin nga ahensia ti gobierno, iti Department of Interior and Local Government nangruna ti Philippine National Police ken kadagiti agserserbi iti gobierno ken pribado a tattao a nakikaysa ken simmuporta iti naballigi a pannakaangay ti Palarong Pambansa 2018 iti Ilocos Sur. (Eden Alviar)