Police Report: Kandidato para bise-mayor, inatake iti puso | Tawid News Magazine - Weekly Ilocos News 📰

Kandidato para bise-mayor, inatake iti puso

VIGAN CITY — Maysa a kandidato para bise-mayor iti munisipio ti Sta. Maria ti inatake iti puso ket natay bayat iti kaaddana ditoy a siudad idi malem ti Abril 29, daytoy a tawen.

Nainaganan ti biktima a ni Adriano Villanueva y Domingo, 70, naasawaan, ken agnaed iti Brgy. Poblacion, Sta. Maria, Ilocos Sur.

Segun iti report ti PNP, maysa a nataengan nga OFW a babai a naka-checkin iti hotel ditoy a siudad idi 1:20 ti malem iti nasao nga aldaw, ti bigla nga agsangsangit a nagpaarayat kadagiti empleado ti hotel tapno tulunganda ti biktima.

Intaray dagiti kameng ti Bureau of Fire Protection iti daytoy a siudad ni Villanueva sadiay Gabriela Silang General Hospital ngem indeklara daytoy a dead-on-arrival ti nangasikaso a doktor. (Tawid News Team)