Kandidato para konsehal, ginudas nakamotorsiklo a tattao

STA. MARIA, Ilocos Sur- Awan pay makalawas a timmapog ti 2010, maysa a kandidato para konsehal ditoy nga ili ti napapatay idi 11:45 ti aldaw ti Enero 6.

Pinaltogan dagiti lalaki a naglugan iti motorsiklo nga XRM ni dati a Barangay Captain ti Cabaroan Antonio Tugade bayat ti panagdaliasatna iti Gen. Luna Street iti Poblacion ditoy a nakalugan iti asul nga XRM nga motorsiklona.

Natay a dagus ni Tugade gapu kadagiti sugatna iti ulo, tengnged ken lapayagna.

Nakarekobre dagiti inbestigador iti uppat a kapsula manipud iti cal. 45 iti nakapasamakan ti krimen.

Segun ken ni Police Inspector Jovencio Urbien Jr., saan pay a nabigbig dagiti pimmatay iti biktima ta awan ti maalada nga impormasion manipud kadagiti agindeg iti balbalay iti nakatambangan ti biktima.

Kandidato a para konsehal ni Tugade iti tiket ni dati a Mayor Edgar Florendo iti babaen ti Lakas-CMD.

Ngem iti interbio ti broadcast media ken ni OIC Provincial Director Supt. Eduardo Dupale, kinunana nga iti panagimbestigada, nakuna ni dati a Mayor Edgar Florendo nga awan met ti problema iti line-upda ken saan met a nabara ti politika iti ilida.

Iti interbiona iti Barangay Commando-Brigada a programa ni Jun Ramos, kinuna ni Urbien a maysa nga anggulo a kitkitaenda ti napalabas a rekord ti biktima.

Segun ken ni Urbien, inarmalait dagiti tattao a nakamotorsiklo ni Tugade iti provincial road a sakup ti Barangay Cabaroan idi Pebrero 28, 2003 ngem nakalasat.

Innayon ti hepe ti polis a napaltogan met ti alleged suspect iti pannakatambang ni Tugade ket napilaan daytoy iti kaso ngem saan nga dimmur-as ti kaso.

Kinuna ni Urbien a nadakamat ti pamilia ti biktima nga adda naawatna a death threat sakbay ti pannakatambangna.

Kinuna ni Urbien a mangiwayatda iti naun- uneg nga inbestigasion mainaig iti pammapatay idinto a nagapela kadagiti agindeg iti itutulongda iti pannakasolbar ti kaso.#