Footer

Kannawidan a sala, kankanta, maitampok iti panagtitipon a kultura ken agtutubo a Bago

CANDON CITY – Mangisayangkat iti panagtitipon dagiti agtutubo a kameng ti tribu a Bago iti dua nga aldaw a youth conference a maangay idiay Barangay Darapidap ditoy siudad iti Disiembre 21-22.

Naisentro ti umuna a Provincial Bago Youth Conference (BYS) Ilocos Sur iti tema a “Ti komunidad ti tribu a Bago iti panawen a digital: pinagkaykaysa ken pinatalged ti naisangsangayan a kultura”.

Kinuna ni Alberto Gaoat, dadaulo ti gunglo, a karaman kadagiti aktibidad iti dua nga aldaw a kumperensia ti pannakaipabuya kadagiti kannawidan a sala ken kanta ti Bago, panaglektiur iti pakasaritaan ken linteg ti Bago, cultural night, tribal dance competition ken dadduma pay.

Impatalgeden dagiti kamkameng ti BYS-Ilocos Sur manipud iti nadumaduma nga upland municipalities ti pannakipartisiparda iti nasao a kumperensia.

Kabayatanna, dagiti nakaugalian a tadek ken aweng dagiti gansa ti maitampok iti founding anniversary ti Banayoyo, Ilocos Sur a marambakan inton Disiembre 27.

Kinuna ni Mayor Severino “Binnoy” Galanga nga agpabuya dagiti agbasbasa iti School of Living Tradition (SLT) kadagiti sala a pakaitampokan ti tadek ti tribu a Bago.

Naipasdek ti SLT a pagadalan dagiti agtutubo a Bago tapno mataginayon ti nakaugalian ken kultura ti tribu a pakairamanan dagiti kannawidan a sala ken kankanta.

“Rambakantayo ti kultura ti Banayoyo,” kinuna ni Galanga.#