Kannawidan Festival, mangrugi inton Enero 29

VIGAN CITY – Mangrugi ti Kannawidan Ylocos Festival inton Enero 29, daytoy ti waragawag manipud iti opisina ti bise gobernador ditoy probinsia.

Kinuna ni Vice Gov. Deogracias Victor Savellano nga iti Quirino Stadium ti pakaangayanen kadagiti aktibidad ti Kannawidan Ylocos Festival, saanen nga iti sanguanan ti provincial capitol a dati a nakaangayanna iti napalabas.

Madama ngamin ti renobasion ti Plaza Salcedo gapuna a naiyalis ti pakaangayan dagiti aktibidad ti nasao a parambak.

Tinawen a rambakan ti gobierno probinsial ti Kannawidan Ylocos Festival kas paset iti panangselebrar iti panagwayas ti Ilocos Sur a kas probinsia idi Pebrero 2, 1818.#