Kannawidan Ylocos Festival

Mannurot: Kolum ni Danny Antalan
(Maikadua a paset)

Tawen 2008, babaen iti bukel nga inmula ni bise gobernador Deogracias Victor Savellano, nga isu ti gobernador ti probinsia iti dayta a gundaway, ti narugian a nagtubo ken nagtubo manipud iti kapitolio ken iti masakupanna; iti kabanbantayan, iti kabaybayan ken iti kapatadan. Napuyotan ti tangguyob a sara a nangipaduyakyak iti maysa a piesta ken parambak. Naaramid ti ritual ket nakita idi ti napintas a pidis ti baboy nga agkunkuna nga agbalin a nasalibukag ti probinsia. Napatit dagiti gangsa ket nagsala ti sangkaprobinsiaan iti naragsak a sala.

Maikawalo a tawenna itan. Natagibi ken naaywanan. Imbag la ketdin ta adda ni Gobernador Ryan Singson nga addaan iti nawada a panagayatna tapno itultuloy daytoy maysa itan a kangayedan a pasken ti pagilian. Isut gapuna nga iti panangaywanna iti probinsia, ad-adda pay a rimmangpaya ti Kannawidan. Kas makita kadagiti programa ita, ad-adu ti aktibidad ken naragragsak dagiti pasken iti amin a suli a pakaisayangkatan.

KANNAWIDAN 2015

Daytoy a tawen 2015, daytoy ti makunkuna a kaattidogan a parambak ti probinsia babaen iti 12 nga aldaw a ragragsak ken ramrambak. Nangrugi idi Enero 29 ken nagpatingga iti Pebrero 8—adda pay pasarunsonna iti Pebrero 13 nga isu ti pallot. Ket kas iti nainsigudan, nalukatan ti piesta babaen iti Misa Konselebrada ken ti libut iti aglikmut dagiti umili ken dagiti rebulto.

Namsek iti aktibidad ti maikaddua nga aldaw a nakairamanan ti panglukat a ritual, pannakalukat ti Tawid ken Partuat ti nadumaduma nga ili ti probinsia ken ti naimbitaran a probinsia babaen iti panangiparangarangda kadagiti One Town One Product. Adda eksibit dagiti babassit a kayo, pannakalukat ti National Museum iti sigud a pagbaludan ti probinsia, Fashion Show dagiti Ilocano designers.

Ti Departmento ti Edukasion ti nangipabuya kadagiti literatura ken arte babaen iti salip kas koma iti folkdancing, rondalla, dance drama, traditional music ensemble, ethnic dance, marching band competition, sinniriban (quiz bee) ken putar ti daniw.

Ti Department of Trade and Industry ti nangisayangkat met iti Delphic games, most innovative product, most dressed booth ken most improved one town one product. Kabayatanna, ti Departamento ti Agrikultura ti nangisayangkat met iti Pinaka-contest kas koma ti kadakkelan a baka, nuang ken kalding ken ti Pinaka-kadagiti naapit iti nateng, mula ken lames. Ti TESDA ti nangisayangkat met iti technology and livelihood training.

Adda met ti uppat a pammadayaw a karaman itoy a tawen: Ti Fr. Burgos Awards a panakabalangat kadagiti umili a timmayok iti naduma-duma a benneg kas koma iti public service, literatura, edukasion, agrikultura, arte ken dadduma pay; ti Gawad Titong Singson Awards; ti Siglat Iskwela Awards; ken ti Nasisiglat a barangay ken munisipio iti nadumaduma a kategoria ken abilidad.

Maysa itan a pagdindinnamagan ti rodeo parade ken lumba dagiti kabalio. Ngem malaksid itoy, adda latta met dagiti nainsigudan a programa kas koma ti Zarzuela Ilocana, pallot ken dadduma pay. Ken siempre, ti salip iti panaglutuan a paseten ti kultura ni Ilocano.

Ti Saniata ti Ilocos Sur 2015 ti saan a maaw-awan a mangiparangarang iti naidumduma a kinalibnos ni Ilocana. Karaman pay ditoy ti salip dagiti Saniata Nga Ubbing.

Ti Kannawidan ngatan ti kangayedan a panagyaman, pananglagip ken panangbiag iti tradision, kultura, ay-ayam, ug-ugali, kinapintas ken kinaragsak iti pagilian.#