Kapaliiwan: Idi ken Ita, Sumalaysu dagiti Isyo

Ni Tatang Lakay\

 (Naisurat daytoy nga artikulo ditoy pagiwarnaktayo idi 2003, sangapulo a tawenen ti napalabas. Ngem ipablaakmi manen ta iti baet ti kaundayen dagiti naruros a tawen, kapaliiwan a dagiti napaspasamak idi ket mapaspasamak latta iti agdama;  awan ti ania a nagbaliwanda, no adda man, nagsukat laeng dagiti nagan ken lugar. Kas kuna ti maysa a miron, sumalaysu. Ania ti panagkitam, kaka? Dakayon ti manghusgar iti kinapudno ti kapaliiwanmi)

Uray pagilo, pirmaan dagiti agilinlinteg

 

Naidardaras ken naikurimed ti panangirussuat dagiti Kongresista iti maikadua nga impeachment complaint maikontra ken ni Supreme Court Chief Justice Hilario Davide, Jr.

Naidardaras ta awan pay naglawagan ti umuna nga impeachment complaint iti Kamara ket adtoy manen ti sabali nga impeachment complaint maikontra ken ni Davide.

Naikurimed ta uray rabrabii, namalaybalay dagiti dadaulo a nangipagna iti impeachment complaint a nagpapirma kadagiti kabaddungalanda tapno laeng magun-odda ti 76 a bilang dagiti agilinlinteg kas sagudayen ti Konstitusion tapno maimpeach ni Davide.

Malagipmi la ket ngarud daytoy nasagangmi nga estoria nga agsirsirkulo iti parparaangan. Saan a kas iti maipalpalapayag kadagiti umili, nalaka kano ti agpapirma kadagiti kongresista, kaka!

No patien ti maysa nga empleado nga agtrabtrabaho iti opisina ti maysa a kongresista, no adda napateg a papirmaan ti amona, mangikuyog kano iti tambor a bassit ken sensilio a naikabil iti tubong.

Kulogkulogen kano ti amona ti sensilio iti tubong, sana ibilin iti empleado nga agtambor idinto a kasla agiwarwaragawag iti boksing a mangulit-ulit iti “ala, e… karne ti baboy… umaykayon umuraga…” sana ikinni ken yayug, “Hey! Hey! Hey!” kas ken ni Mr. Suave.

Presto, kasla makangeg kano a tuleng dagiti kongresista ket agdadarisonda nga umasideg ta karkarna a karne ti ipauraga ti amona.

Isapsapata ti nasao nga empleado a basta adda karne ti baboy a mauraga, uray pagilo, pirmaan dagiti kongresista!

Ngem iti sabali a bangir, no agsarita dagiti politiko (puera de los buenos), kunam la no santoda. Kunam no saanda a makapettak iti bulong. Nadalus ti konsensiada. Awan mulit ti dakulapda. Kadakuada, ti interes ti pagilian (kuno) ti umuna.

No patien ida, saan ngarud a pudno dagiti damag nga awan ti sumrek iti bulsada kadagiti itudoda a proyekto nga aggapu iti CDF (Countrywide Development Fund (cdf) ti awagna idi kanikasangapulo a tawen, ita nagbalinen a PDAF – Ed.).

Kasta met nga awan ti kinaagpaysona nga adda bingayda kadagiti programa ti turay nga agsangpet iti distritoda.

Kuna ni Atong a pinagkuros pay ti maysa nga agilinlinteg ti ramayna iti batog ti barukongna, sana kinuna, “ Uray makimat ti dimmagan a katugangak…”

Ay, uray la kano nagkulagtit ni Atong ta kellaat lattan a limteng ti nagsanga a kimat a nanguram iti nagkaruotan nga aglawlaw ti kamposanto!

Ngem kaniami a biang, talaga nga awan ti pamilawantayo kadagiti imbaontayo nga agilinlinteg. Masiribda ta amin a linaon ti Konstitusion ken linteg ti pagilian, ammoda nga imurian ti pudpudno a kababagasda.

Kas iti agdama a kontrobersial nga isyo mainaig iti legalidad ti maikadua nga impeachment complaint nga impilada maikontra ken ni Davide.

Kuna ti Konstitusion a saan a mabalin a ma-impeach ti maysa nga impeachable nga opisial (kas iti Presidente, Chief Justice, kdpy.) iti nasursurok ngem maminsan iti las-ud ti makatawen.

Ngem ania daytoy nga inaramidda? Di pay naglawag ti umuna a complaint, adtoy ti sabali nga impeachment complaint nga impilada idinto nga awan pay makatawen ti baetda.

Madi, kuna ti Korte Suprema.

Mabalin, impetteng dagiti Kongresista. Ket no nangisit kunada, nangisit lattan.

Kas ken ni Doming, mabalin amin.

Maawaganda pay iti Kongresista no dida ammo a ti killo ket mabalin a malinteg ket ti nalinteg mabalin a kiluen? Agilinlinteg, kunam man!#