Kapaliiwan: Idi ken ita, sumalaysu nga isyo: Ipakat ti linteg!

Ni Tatang Lakay

 

Itay Oktubre 17, kalpasan ti tallo bulan a panagpalutpot, rinuk-atan ti Feliciano Commission ti reportna mainaig iti inwayat a kudeta ti grupo a Magdalo idi Hulio 27.

Pinatalgedan ti Feliciano Commission dagiti intelligence reports a ti yaalsa dagiti aganay 300 a military officials ken soldadoda ket maysa a dakkel a plano a panangrabsut iti turay.

Ipetpetteng dagiti lider dagiti rebelde a soldado a nagkaykaysa a rikna ken panunot ti nangiduron kadakuada a nagdadarison iti Oakwood Hotel tapno iruarda dagiti ir-irukenda maikontra iti gobierno ken dagiti turayenda.

Iti report ti komision, kinunana a paset ti dakkel a panagkukumplot a panangrabsut iti turay manipud iti administrasion ni Presidente Gloria Macapagal-Arroyo, isublida ti turay ken ni napadisi a Presidente Joseph Estrada iti tallo nga aldaw sada mangdutok iti 15 nga agbalin a miembro iti konseho a mangituray iti pagilian.

Kinuna pay ti report a suportado dagiti grupo nga adda pannakainaigda ken ni Estrada ken ni Sen. Gringo Honasan ti grupo a Magdalo a nangiwayat iti yaalsa.

Madakamat ditoy a ni Honasan ti nangidaulo kadagiti sumagmamano a kudeta maikontra iti turay ni Pres. Corazon Aquino a naipatugaw a pangulo ti pagilian kalpasan ti People Power Revolution idi 1986.

Awan ti nagballigi kadagitoy a kudeta agsipud ta saan a sinuportaran dagiti umili ti panggep da Honasan a mangrabsut iti turay.

Kastoy met laeng ti konklusion ti komision – maysa a miskalkulasion iti biang dagiti rebelde a lider dagiti soldado ti sentimiento ti publiko agsipud ta napaay a nanggun-od iti suporta dagiti sibilian, malaksid dagiti grupo nga asideg kada Honasan ken ni Estrada.

Kasta met a saan a sinuportaran dagiti senior a military officers ti panggep ti grupo a mangrabsut iti turay.

Ti pannakapaay ti grupo a nanggun-od iti suporta dagiti senior officers ti paripirip a bimmaba ti propesionalismo iti AFP Officer Corps, kinuna pay ti komision.

Indagadag ti komision a kasapulan a maipakat ti linteg maikontra amin kadagiti naglabsing nga opisial, tropa ken kaduada a sibilian tapno matimbeng ken maiwalin ti kultura a saan a pannakadusa.

Ayonanmi ti rekomendasion ti komision. Agsipud ta agingga a maikkan dagiti rebelde nga opisial ti militar ken soldado iti nalamuyot a pannusa, masinunuo a mapaturedda laeng a mangiwayatto manen iti sabali a yaalsa tapno rabsutenda ti turay.

Dakkel a biddut ti inaramid ni dati a Pres. Fidel Ramos a nangdusa laeng kadagiti nagkudeta a soldado iti push-ups. Ditoy laeng pagilian ti pakapasamakan dayta. Kadagiti sabali a pagilian, nadagsen a basol ti panagpanggep a mangrabsut iti turay. Mausig dagiti nagiwayat iti kudeta iti babaen ti court martial a pannakatay babaen iti firing squad ti masansan a maiyetnag a pannusa.

Nabatad ti report ti Feliciano Commission. Adda ngarud itan iti ima ti Department of Justice ti pannakaipamatmat a ditoy pagilian, nagngipen ti linteg ket saanen a santuen uray dagiti nangangato ti saadda a turayen a nagpanggep iti dakes iti turay.

Masipsiputan ngarud ti pagbanagan daytoy a kaso a nakaimbolbaran dagiti military officials ken soldadona.#