Kapilia, dormitorio, nagsaruno a natakawan

VIGAN CITY – Dua manen a panagtakaw ti naireport ditoy siudad iti las-ud ti dua nga aldaw a naisayangkat iti kapilia ti maysa a sekta a masarakan iti Rivero Street, Barangay 8, ken iti dormitorio a masarakan iti Barangay Tamag.

Inreport ni Jefferson Corpuz y Pineda, 32, naasawaan, lider ti Church of Jesus Christ of Latter-Day Saints, ken residente iti Barangay Ayusan Norte, Vigan City, iti polis a natakawan ti kapiliada iti dua a computer units nga agbalor iti P70,000.00.

Naduktalan laeng ti panagtakaw idi agarup alas 8:00 ti bigat ti Marso 22 babaen dagiti miembro ti nasao a sekta a sumrek koma iti klaseda.

Iti panagimbestiga dagiti polis, nakastrek dagiti mannibrong babaen ti panangragadida iti akinsango nga steel grill bars ket ditoy met laeng ti naglibasanda.

Nakakita dagiti inbestigador iti tedted ti dara a suspetsada a nagtaud iti suspek a mapapati a nasugatan bayat ti panangragadina iti grill bars ket daytoy ti insubmiteda iti crime laboratory ti Ilocos Sur Police Provincial Office para iti serology examination.

Kabayatanna, natakawan ti LP Madriaga Dormitory iti lap top a a kukua ni Eden Lenerma Veronilla, 20, balasang, natibo iti San Juan, Abra, ken net book a kukua ni Marinel Sicmaner Solina, 21, balasang, natibo iti Barangay Danac, Sugpon, a mapapati a naisayangkat idi sardam ti Marso 24.

Naammuan iti inbestigasion a kinandaduan ti kabsat ni Sicmaner ti kuartoda sa pimmanaw idi agarup alas 7:00 ti sardam ti nadakamat a petsa ngem idi agsubli ni Sicmaner, nakitana a nakalukaten ti kuartoda ket nadadael ti padlock ti ridaw.

Agpateg iti P23,000 ti lap top ni Lenerma idinto a P13,000.00 ti balor ti natakaw a net book ni Sicmaner.

Mapapati a simrek ti suspek iti ridaw ti main door ti dormitorio ket ditoy met la ti rimmuaranna.

Segun iti maysa a kakasera ni Sicmaner, maysa a dina nabigbig a lalaki ti nakitana a simrek iti kuartoda ken rimmuar met laeng kalpasanna.

Ngem saan a dimlaw ti kakasera ni Sicmaner ta awan nakitana a laptop wenno net book nga awit ti suspek idi rimmuar iti kuarto.

Suspetsa dagiti polis nga inkabil ti suspek dagiti tinakawna iti back packna isu a saan a nadlawan ti kakasera ni Sicmaner.

Agtultuloy ti panagimbestiga dagiti polis mainaig kadagiti dua a panagtakaw.#