Footer

Kapitan Sabas (Maikadua a paset)

Maipanggep kadagiti barangay tanod, nabingayen dagitoy iti agkadua. Iti kasta, makapagsinnublat dagitoy nga ag-duty no adda pasken: piesta ti barangay, natayan, wenno kasaran. Uppat a barangay tanod ti ag-duty iti alas sais iti malem agingga iti alas dose ti rabii. Sumarunonto met nga ag-duty dagiti tallo a tanod ken ni chief tanod. No adda agkasangay, ti akinsektor a barangay tanod no kua ti agbantay. Ti kasayaatan a nabaliwan kadagitoy ket saanda pulos a sumimsim iti arak no adda pasken. Nainget dayta a bilin ni kapitan. Agmultada iti limagasut a pisos no aglabsingda. Narigat dayta kadagiti Dimas (Di Maus-usawan) ngem tungpalenda ta dayta ti bilin. Pagsayaatanna, kalpasan ti pasken, agumadanton iti arak ken pulotan manipud iti bolsa ni kapitan. Ti sigud, dudua wenno taltallo a barangay tanod ti agparang no adda pasken ti barangay. Sakbay ti alas-dose, in-inuten dagitoy nga agpukaw. Manmano no makompletoda nga agduty. Agpapadada ketdi a nakainom iti nasanger no adda pasken.

Iti biang ti panagkalap, maipariten ti agkalap babaen ti kuriente. Adda ketdi dua a paset ti karayan a rinamaan ti barangay, maysa iti daya ken maysa iti laud iti asideg ti Bantay Uong. Nairanta dagitoy a rama a maburak iti aldaw ti paskua ken piesta ti barangay. Mabalin latta met dagiti tattao ti agaramid iti ramada iti sadino man a paset ti karayan.

Immigupak manen iti kape. Inyamuyko nga inpalikud dagiti bimmaba iti abagak a buokko. Mangrugin nga agbabasa ti muging ken bukotko nupay naka-sleeveless ken naka-leggings-nak laeng. Wumanengweng pay ti bassit a bentilador iti lamesita iti sikigan ti katrek. Nabiit pay a timmalaw ni Manang Analyn. Simmeksek manen iti panunotko ti nagparang iti wall-ko. Masemsemak man kadaydiay a nag-post.

Kinapudnona, ita pay laeng a nagbaliw ti barangaymi. No sumaen, daytoy naaramidan ni Kapitan Sabas iti lima a bulan a panagtakemna ket katukad ti dua tawen a panagtakem ni Kapitan Narglon.

Iti biang dagiti agtutubo, adda ginatang ti barangay a net ken bola ti volleyball. Inpuestoda ti net iti likud ti eskuela elementaria. Adda inayaban ni Kapitan Sabas a mangisuro kadagiti babbaro nga agbasketball. Immadu pay dagiti naikkan iti scholarship grant. Nagaget ngamin ni Kapitan Sabas a mapan ag-follow-up iti resolution ken natured a dumawat iti tulong idiay kapitolio.

Saanen nga ul-ulila ti dalikan iti kusina ti barangay. Kumpleto manen ti alikamen iti kusina – kumpleto met idi ngem in-inutda a nagpukaw. Narigat met ti agipapan – basta ti laengen dalikan ti nabati iti kosina. Ita, namnamseken iti aruaten a naidalimanek iti estante. Ni Kagawad Michael ti nadutokan a mangiggem iti tulbek ti kusina agraman ti dua a C.R. – saggaysa ti para babai ken lalaki. Adda record book nga iggemna. Ditoy nga ilistana dagiti magatang ken mausar iti kosina.

Nakumpleto payen a nagsilaw dagiti bombilia ti gymnasium. Malagipko la daydi panagpraktis dagiti ubbing para iti street dancing iti piesta ti ili idi sakbay ti eleksion. An-anusan dagiti D.I. a prinaktis dagiti ubbing iti sirok ti duddudua a bombilia ti gymnasium.

Naragsak ti umuna a paskua iti panagtakem ni Kapitan Sabas. Agsapa ti kaaldawan ti paskua, pinakalapna ti rama idiay daya. Pinaibaga ni kapitan kadagiti kagawadna kadagiti ipurokanda a mangaldawda amin iti barangay gymnasium. Naglutoda iti innapuy iti kusina ti barangay. Addaak idi ta subsubaybayak idin amin a gannuat dagiti baro nga opisial ti barangay – gapu ta ar-aramidenda ti pagrebbenganda. Nagturposak idin iti kursok a BSE major in English. Linutoda pay amin ditoy dagiti nakalapanda. Alas dies ngata iti bigat, adu nga inna ti simmangpet iti kusina. Nasiputak ti panagtubbog dagiti mata ni Kapitan Sabas. Ammok a lua ti ragsak – ta adda amin bitbit dagitoy nga inna a natnateng. Makaluaak metten ta saan kadi a makaabbukay iti rikna ti panangsubad dagitoy a bumarangay iti nasayaat a panagtakem ni kapitan ken dagiti kakaduana? Daytoyen ti bunga ti maysa a proyektona – ti Kanatengan iti Arubayan. Naragsakkami a bumarangay, agraman ni Apo Mayor, Bise Mayor ken dagiti dua a konsehal ti ili, iti immuna unay a boodle fight a pangaldaw ti Barangay Quimmalbo. Iti rabii, kalpasan ti Misa Aguinaldo, narugian ti programa iti gymnasium. Immuna a naangay ti pasala. Simmaruno dagiti salip iti kanta, sala ken panagdaniw. Sa ti raffle draw. Adda amin numero dagiti nagsurat iti attendance sheet. Adda limapulo a naikkan iti sagut. Anian a ragsak dagiti bumarangay idi imbaga ni kapitan a nangted da mayor ken bise mayor iti sagtatallo ribuda gapu iti nakitada a kinaanep dagiti opisial ken ti suportda dagiti bumarangay. Naitipon pay ditoy ti naglakuanda iti apitda a balangkoy.

Iti maikadua a tawen ni Kapitan Sabas, immuna a proyektoda ti pannakaipatakder ti dua kadsaaran a pasdek iti amianan ti kosina, maysa a kuarto iti baba ken maysa iti ngato, iti lauden ti kusina ti barangay. Ti akinbaba ti pagikabilanda kadagiti nabatbati a sanikua ti barangay: Monobloc a tugaw, bangko, pulpito, pinggan a maipabulod, sobra a pintura, props iti street dancing, agraman dagiti sobra a nausar iti panagpatakderda iti pasdek, ken dadduma pay. Adu idi ti monobloc a tugaw kada bangko ken pinggan. Gapu ngata iti kabubulod a kimmisang dagitoy. Addada pay bangko ti barangay a nakitkitak idi iti balay ti maysa a pasado a kagawad. Adda nairanta a record book para ditoy. Isurat ti kagawad nga Officer of the Day dagiti mabulod a ramit ti barangay, nagan ti bimmulod, aldaw ti panangbulodda, ken nagan ti nakaduty. Isuratna pay ditoy dagiti ramit a maisubli, nagan ti nangisubli, aldaw a naisubli, ken ti naganna a naka-duty. Isuratna pay ditoy no adda natukkol a saka ti monobloc, no adda kurang ti pinggan wenno bangko, ken no ania ti depekto dagiti maisubli. Nasayaat daytoy a wagas tapno maamuan no asino dagiti bimmulod a kurang ti insublina. Iti kasta, ammo ti barangay ti tuduenna a mangsukat iti napukaw wenno ania man a napasamak iti binnulodna. Awan ketdi bayad a singiren ti barangay kadagiti bumulod. Iti laeng Quimmalbo a maipabulod dagitoy a kukua ti barangay. Pinagbalinda a biblioteka ti akingngato a kuarto. Ditoy nga inkabilda dagiti libro a sigud a naipuesto iti session room. Nasayaat unay daytoy nga inaramid dagiti agdama nga agtakem. Adu ngamin ti libro idi kadagiti estante iti session room. Ngem no kasta a piesta wenno programa ti paskua iti barangay ket nakalukat ti session room. Ditoy ngamin nga agsagana dagiti agsala, agdrama, ken dadduma pay nga agpabuya, dagiti makoronaan ken dagiti crown bearer, sash bearer no piesta. Agingga a bimmassit dagiti libro ta kumporme met lattan ti sumrek no kua. Ita, addan biblioteka ti barangay. Ket saluduak unay ni Kapitan Sabas, ti ibagbagada a takrot a kapitan. Kinapudnona, sumagmamano kadagiti librok idi addaak iti kolehio ti indonarko. Ammo ni kapitan, ken ammok unay, a napateg unay kadagiti ubbing isu nga inkagumaanna ti nagpatakder iti kuarto para iti biblioteka.

Inyamlidko ti bukot ti kanawan a dakulapko kadagiti matak ta mariknak a tumbogda. Nagysayaat ketdin ti rikna no iserbim a napudpudno ti naited kenka a pagrebbengan.

(ADDA TULOYNA)