Footer

Kapitan Sabas (Maudi a paset)

Simmaruno a proyekto dagiti opisial ti pannakasemento ti sigud a kayo a rangtay ti karayan iti asideg ti Bantay Uong. Nalawa a kataltalonan ti nagbaetan ti karayan ken bantay. Dakkel a gin-awa kadagiti mannalon ti pannakasemento ti rangtay ta saanda a marigatan a mangilasat kadagiti karison, kuliglig, kalongkalong ken traysikelda. Marigatanda ngamin a mangilasat kadagiti luganda no panagtatalon nga agisalogda kadagiti abono. Nakarkaro manen no panawen ti panaggagapas.

Iti maikadua a tawen ken walo a bulan a panagtakem ni Kapitan Sabas, nasementon ti gudua kilometro a dalan a kumamang iti kalsada nasional. Napatakderan pay iti naintar a sementado a plantbox iti agsumbangir ti kalsada. Namulaan dagitoy iti pusa-pusa, daydiay nasurok pagattao ti kadakkelna a klase ti pako a kaaduanna a masarakan iti Bantay Uong. Makunak a kaaduan kadagiti kalugaranmi ti maragsakan iti makitkitada a panagbalbaliw ti barangaymi. Ngem, kas tay kunadan, addada latta itta iti sangasalup a bagas. Sangkakuna dagitoy nga adu kano manen ti naibulsa dagiti agdama nga opisial nangruna ken Kapitan Sabas. Diak met ketdi mababalaw ida ta naruamda ngata idin a makaripripar kadagita a pasamak.

Lima a bulan sakbay a nagkaseraak ditoy Rizal, marugrugianen a masemento ti dalan nga agpaamianan. Segun iti plano a naipaskil iti igid ti kalsada, walo gasut a metro ti kaatiddog ti masemento. Apagisu daytoy nga agtunged iti nagsapalan a nagbedngan ti purok Talinaay ken Naulimek. Naggapu ti pondo manipud iti gobierno probinsial.

Inuyosko ti nauneg a sennaay. Nagsubli iti panunotko ti nabasak iti wall-ko. Timmakderak sa tinurongko ti banio. Indayyengko ti Vulnerable a kanta ti Roxette.

Nagtarusak a kinita ti selponko idi makaruarak iti banio. Uppat ti simmangpet a text message; ni inang, ni Ridel a bf-ko, ken ni Zandra a co-teacher-ko. Apagapaman a nagdalagudog ti barukongko. Binasak ti text ni Ridel. Kumkumustaennak. Insarunok a binasa ti text ni inang. Uray la dimmakel dagiti paningkiten a matak. Nag-resign kano ni Kapitan Sabas! Inibbatak ti selponko iti katrek. Masemsemak kaniana! Kasano pay ita a maituloy ti irarang-ay ti Quimmalbo? Kakaisuna nga adda isuna a nangparang-ay, nangbalbaliw iti barangaymi, sa ket nag-resign! Kusto ti nai-post iti wall-ko! Mabuteng daytoy inton eleksion? Apay koma a mabuteng ket awan met kinurakotna? Mabuteng nga ‘iggaman’ dagiti nangato ti takemna iti probinsia?

Inikkatko ti leggings-ko saak nag-siorts. Rimuarak iti kalsada ta ad-adda a pudotenak – nupay ammok a nabarbara iti ruar ngem iti kuartok. Awan masnop a turongek. Tinurongko ti agpa-Floraville, kumamang daytoy iti Blue Boz no aglikkoak agpakanigid, idinto nga ipukpukkaw ti panunotko ti: Takrot! Takrot a kapitan! Mabuteng a maitulad kadaydi kapitan nga ‘intumbada’?

Simmeksek iti panunotko dagiti naaramidan ni Kapitan Sabas iti Quimmalbo, sa ti pamiliana, sa daydi pinatayda a kapitan. Madamdama, kasla nalawlawagan ti panunotko. Wen, nagdakkelan ti naaramidanna iti barangaymi – isuna pay laeng ti nakaaramid iti kasta iti pakasaritaan ti Quimmalbo! Nakariknaak iti panagbain iti bagik gapu iti pananggurak kaniana. Ammok a saan laeng a dakami nga agindeg ti makasapul kenkuana. Ala, wen, kinatakrot no kinatakrot ti panag-resign-na. Ngem, adda met pamiliana a pangibubosanna kadagiti nabatbati nga aldaw iti biagna. Ammok, makatulong latta met isuna uray awanton iti pulitika. Sa maysa, adda met dagiti kagawadna a sumukat kaniana. Mabainto la ketdi, no asinonto kadakuada ti mapagasatan a kapitan, ti sumukat nga awan maaramidanna bayat ti panagtakemna.

Inruarko ti selponko ta agopenak iti facebook. Ngem, naiddep daytoy. Itay pay gayam a nagpakdaar ti bateriana. Nagbueltaak. Agsubliak idiay kasera tapno i-charge-ko toy selponko. Iti dalan, nabukelen iti panunotko ti ipostek madamdama iti facebook: Saluduanka, Kapitan Sabas! Godbless Quimmalbo.