Footer

Kapitan Sabas (Umuna a paset)

NABAYAG a nakapundo dagiti matak iti screen ti Samsung Galaxy S7 a selponko. Awan pay makabulan daytoy a selponko. Nabayag nga inan-anusak – inanusannak met – daydi Nokia 1208 a pakalaglagipak kadagidi nagkandidato iti lokal, karaman ti sangguniang bayan (inawatko ti inyawatda ngem imbotosko ti ammok nga agserbi iti napudno). Matmatmatak ti screen ngem adayo ti yan ti panunotko. Ketdi, nagtalinaed iti ulok ti nabasak itay a limmabas iti wall-ko iti FB: Kapitan Sabas, katakrotan a kapitan.

Manmano a lukatak ti FB accountko. Makauma ngamin dagiti poste a panagiinnapa nangruna dagiti agassawa kada ag-siota (makiusoak man met), wenno dagiti ag-bes, dagiti mangiprangka iti panagsingirda iti utang, ken dadduma pay nga iposposteda a kaslada la agpapansin, kas kuna dagiti agindeg ditoy Rizal, Makati. Dagiti laeng nakigrupoak iti FB ti naynay a palpalabsak kas iti Pinoy Tropical Bonsai, Chiliheads Philippines, Rare Fuit Society of the Philippines ta adu ti maadalko ditoy iti panagmula, ti pay grupomi a mannursuro iti UMAK wenno University of Makati. Timmalawakun kadagiti grupo a basta lattan in-add-dak, nagruna dagiti ginagatel la ti tungtonganda. Immigupak manen iti kape sa kimmitaak iti kalsada a sango ti kaserak ditoy Amorseco Street, Rizal, Makati City. Kaduak nga agkasera ditoy kuarto ni Manang Analyn. Dua tawen ti inaunaanna ngem siak iti tawenko a duapulo ket maysa. Taga-Ballesteros ken saleslady idiay Market Market iti Taguig. Maysa sakay laeng ti traysikel agingga iti Staff House sa ballasiwenna ti flyover iti ngatuen ti Carlos P. Garcia Avenue sa makadanon iti mall. Apagisu a lumabas ti maysa a babai a nars iti OSMAK wenno Ospital ng Makati. Sabado ita. Tallo bulanko pay laeng a mangisursuro iti UMAK. Simmaruno a limmabas ti tallo nga ubbing, dua a lallaki ken maysa a babai, nga inaldaw a linaon ti pangileten a kalsada. Tineksak ni inang. Dinamagko no apay daydiay ibagbagada a takrot ni Kapitan Sabas. Indissok ti selponko iti abayko.

Kinitak manen ti selponko. Yolanda Capnis ti account name iti FB ti nagpost. Makalawas pay laeng a naaramid dayta nga account. Ladawan ni Ganda ti telenobela Bagani ti profile picturena. Ammok lattan a linoloko daytoy nga account. Ngem asino ngata daytoy? Nalabit, maysa daytoy kadagiti nadalapus, wenno napasaktan ni kapitan, iti panangbalbaliwna ti barangaymi a Quimmalbo? Takrot? Diak la patien daytoy!

Da Kagawad Rolando ken Kagawad Jobert ti nakasango ni Kapitan Sabas itay eleksion ti barangay dua tawenen ti napalabas. Lepleppas ti umuna a termino ni Kapitan Narglon. Segun iti damag, saan kanon a palubosan nga agkandidato da Manang Eva ken Jomar. Naikamang idiay Zambales ti kakaisuna nga anakda. Nalabit, iyal-alikaka dagitoy ti salun-at ni Kapitan Narglon. Idi ngamin makabulan pay laeng a panagtakem daytoy, adda pinaltoganda a kapitan iti kabangibangmi a barangay, ti Simmubuan. Adu idi ti mangibagbaga a mainaig daytoy iti pulitika. Nasurok laeng a tallopulo ti nangitarayan ni Kapitan Sabas ken ni Kagawad Jobert. Sangapulo ket innem met ti nakaarusan ni Kagawad Rolando ken Kagawad Jobert, agpada dagitoy a nakatallo a termino. Nakakasdaaw kunada ti panangabak ni Kapitan Sabas. Gapu ngata ta inabak ida ti kattiliw (maipanggep iti pulitika) a maestro idinto a nagkagawad dagitoy? Ken gapu ngata ta nanguartada kano (adu ti damag a kasta kalpasan ti eleksion) idinto a saan ken Kapitan Sabas? Kano kunak ta isu met ti ibagbagada. Awan asuk no awan ti puor.

Makatawenen a nagretiro a prinsipal ti elementaria ni Kapitan Sabas sakbay ti eleksion. Awan pay napuotak a madi a damag kenkuana maipanggep iti barangay ken iti eskuela nga iggemna idi. Isuna ti nangpapintas iti Quimmalbo Elementary School. Manipud idi isunan ti prinsipal ditoy, inistriktoanna dagiti mamaestra. Imparitna pay dagiti softdrinks iti kantina ti eskuela. Uray ti panagpuor kadagiti ruot, inparitna. Daytoy unay ti ammok a nagpangalan ni Kapitan Sabas iti panangabakna.

Dua ti anakda ken ni Anti Ester; da Nicole, doktora ken adda idiay Baguio, ken Zachary, ti buridek. Mangisursuro iti Senior High School idiay ili. Adda maysa nga anakda ken Michelle nga sawana. Agkakabbalayda iti bunggalow a pinatakder ni Kapitan Sabas idi maikalima a tawennan a mangisursuro – saan pay a prinsipal idi. Nalawa ti kanatengan iti agsinnumbangir a bakrang ti balayda. Adda met pagtaraknan ni kapitan iti Sasso iti likud iti balayda. Iti amiananen daytoy, naintar dagiti nadumaduma nga agbungbunga a kayo.

Makabulan pay laeng kalpasan a nagtugaw ni Kapitan Sabas ngem makitan a dagus dagiti gapuananna. Inistriktoanna dagiti kagawadna. Saan a maala dagitoy ti honorariumda no nagkaruotan ti kalsada ti purok nga imatonanda. Ita, nakadaldalusen amin a kalsada ti Quimmalbo. Nupay kasta, adu latta dagiti kontra ti panunotna. Kasta kano pay laeng no damdamo ngem kaslanto man met laengen iti inaramid ti pasado a kapitan ti ubraenna, sangkakunada dayta. Nabaybay-an ngaminen ti lugarmi kadagiti naudi a tawen ti panagtakem ni Kapitan Narglon.

Iti sardam, adun dagiti ubbing nga aggaayam iti saan pay nasemento a kalsada ta nasukatanen dagiti pundi a bombilia dagiti street lights (taltallon sa ti agsilsilaw idi no diak mariro).

Iti sumuno a bulan, sakbay ti panagmumula ti nateng, adu manen dagiti sayangguseng a timmaud. Balangkoy, kahoy kuna ti dadduma, laeng ngamin ti impaimula ni kapitan iti gudua ektaria a community garden. Sigud nga adu ti imulmulada: sitaw, tarong, paria, tabungaw, okra, karabasa, patani, kabatiti ken marunggay. An-anuem ti nagadu a balangkoy? Kuna manen dagiti sumupiat. Adda met rason ni kapitan. Maymayat kano no iti arubayan ti kada pagtaengan ti pagmulaanda tapno kano madalusan ken maistimarda dagitoy iti bakante nga orasda. As-asideg payen ti pagapitanda ken mabantayanda dagitoy. Inawaganda daytoy iti Kanatengan iti Arubayan. Adda dagiti hybrid a bukel ti nagduduma a nateng nga inwaras dagiti opisial kadagiti pito a purok. Nadawat kano dayta ni kapitan ken ni Sir Ferdinand iti opisina ti Agrikultura. Ninayonanna kadagiti bin-i manipud iti kanatenganna. Iti ngamin community garden, adda mailatang nga aldaw ken oras ti panagmula ken panangistimar kadagiti mulada. Ti parikut, saan nga agpapada ti libre nga oras ken aldaw dagiti bumarangay. Maysa pay, addanto latta met dagiti nasikap a makaadu nga agburas kadagiti bunga dagiti mulada. Adda pay intedna a sangapagasawaan a sasso iti pito a purok. Pagsisinnublatanda daytoy a taraknen.

(ADDA TULOYNA)