Kapitan ti barangay, nalasatanna pannakasanebna

SINAIT, Ilocos Sur – Sinaneb dagiti armado a tattao ti maysa a barangay kapitan ditoy ngem saanda a napuruan.

Naambos da Barangay Captain Edwin Ramos, ti asawana ken dadduma a kaduada bayat ti panagdaliasat ti luganda iti Barangay Katipunan iti agarup 1:45 iti parbangon itay nabiit.

Segun iti report, pinarutupot dagiti nagsaneb ti lugan da Ramos, ni Erlina nga asawana, annakna ken di pay nainaganan a kaduada iti asideg ti bassit a rangtay iti nasao a barangay.

Nabtak ti windshield ti lugan ket nadundunor ni Erlina iti ima ken pingpingna gapu kadagiti shrapnel.

Inreport da Ramos ti insidente iti polis ket dagus a nagturong dagitoy iti ambush site ngem awanen dagiti nagsaneb.

Nakarekobre dagiti polis iti 4 a kapsula manipud iti M-16 iti nakapasamakan ti pammaltog.

Iti pannakaisurat daytoy, saan pay nga ammo ti kinasiasino dagiti nagpanggep iti biag ni Ramos ken no ania ti motibo iti panagsaneb.#