KAPITOL Outreach Program naidanon iti Cervantes ken Quirino

CERVANTES, Ilocos Sur – Dimmanon dagiti empleado ti kapitolio ken representante dagiti nadumaduma a national line agencies iti ili a Quirino ken daytoy nga ili idi Oktobre 1, 2012 babaen ti Kakabsat nga Agnaed iti Probinsia ti Ilocos Sur Idanonmi ti Tulong ken serbisio, aniaman nga Oras dita Lugaryo wenno KAPITOL Outreach Program kas dawat ti agduduma a barangay.

Addaan  ti KAPITOL Outrich Program iti nadumaduma a paset: umuna ti medical ken dental mission a no sadino a tinaming dagiti doktor manipud kadagiti district hospitals ken sumagmamano a volunteer doctors dagiti sagubanit dagiti umili ken pannakaipaay ti libre nga agas depende iti kasapulan dagiti lumugar; maikadua ti pannakaipaay dagiti agduduma a serbisio dagiti national line agencies ken pannakasungbat dagiti parikut dagiti umili mainaig iti concerned agencies; maikatlo ti pannakaisayangkat ti serminar ken workshops kadagiti barangay officials, barangay treasurer, secretary, barangay tanod, lupong tagapamayapa, BHW, BNS ken dadduma pay a mangidaulo iti barangay, ken maikapat ti pannakaiyawat kadagiti requests ti tunggal barangay.

Inawat ti ili a Cervantes dagiti nadumaduma a kitchen utensils a pakairamanan dagiti dadakkel a kaldero, siliasi, water jugs, dadakkel a timba, kutsara ken tinidor, tasa ken baso, tugtugaw ken lamisaan, gas stoves, computer sets, hand tractors (kuliglig), wheelbarrow, tolda, water hose, grasscutters, agdan, pilid ti ambulansia, ken financial assistance.

Inawat met ti Quirino dagiti kitchen utensils kas iti dadakkel a kaldero, siliasi, water jugs, dadakkel a timba, kutsara ken tinidor, tasa ken baso, tugtugaw ken lamisaan, gas stoves, computer sets, hand tractors (kuliglig), water hose, tubo, grasscutters, megaphones, mini sound systems, musical intruments, barb wires, blow torch, electric fans ken financial assistance.

Naikkan met iti wheelchair ken sarukod dagiti nataengan ken addaan ramgkap.

Mismo a da Gov. Luis “Chavit” Singson ken Bise Gobernador Deogracias Victor Savellano ti nangiyawat kadagiti ramit nakaisangratanda. Agpada a dinawat dagiti opisial ti pananggundaway koma dagiti umili kadagiti amin a serbisio nga ipapaay ti KAPITOL idinto a personal nga inammoda dagiti dadduma pay a kasapulan dagiti umili para iti madagdagus a pannakaaksionna.

Kabayatanna, nailukat iti daytoy met laeng nga aldaw ti Halfway Home ken baro a Rural Health Unit ti Cervantes. Agserbi ti Halfway Home a temporario a pagnaedan dagiti masikog, tallo nga aldaw sakbay ti panaganakda sada maidiretso iti RHU iti kaaldawan ti panaganak.

Segun ken ni Mayor Maggay, maysa daytoy a wagas ti LGU ti Cervantes a mangkissay no di man mangpukaw iti kaso dagiti matay nga aganak ken kaiyan-anak. (Mancielito S. Tacadena)