KAPITOL outreach program naidanon iti dua nga upland municipalities

SAN EMILIO, Ilocos Sur -Dimmanon dagiti empleado ti kapitolio ken representante dagiti nadumaduma a national line agencies iti ili a San Emilio ken Lidlidda idi Disiembre 16 tapno idanonda dagiti agduduma a kasapulan dagiti duapulo ket maysa a barangay babaen ti Kakailian nga Agnaed iti Probinsia ti Ilocos Sur Idanonmi ti Tulong ken serbisio, aniaman nga Oras dita Lugaryo wenno KAPITOL Outreach Program.

Addaan ti nasao a programa iti nadumaduma a paset. Umuna ti medical ken dental mission a no sadino a mataming dagiti sagubanit dagiti umili babaen kadagiti doktor manipud kadagiti district hospitals ken sumagmamano a volunteer doctors ken pannakaipaay ti libre nga agas depende iti kasapulan dagiti lumugar; maikadua, ti pannakaipaay dagiti agduduma a serbisio dagiti national line agencies ken pannakasungbat dagiti parikut dagiti umili mainaig iti concerned agencies; maikatlo, ti pannakaisayangkat iti serminar ken workshops kadagiti barangay officials, barangay treasurer, secretary, barangay tanod, lupong tagapamayapa, BHW, BNS ken dadduma pay a mangidaulo iti barangay ken maikapat, ti pannakaiyawat kadagiti requests ti tunggal barangay.

Inawat dagiti walo a barangay ti San Emilio ken Lidlidda dagiti nadumaduma a ramit iti talon a pakairamanan ti corn sheller, kuliglig, power sprayer, knapsack sprayer, water pumps, 9 electric water pump,  hose, grasscutter, ken G.I Pipes.

Naikkan met iti wheelchair ken sarukod dagiti nataengan  nga agkasapulan ken tseke a sag-P4,000 tunggal barangay.

Mismo a da Gov. Chavit Singson ken Bise Gobernador DV Savellano ti nangiyawat kadagiti ramit bayat ti programa. Agpada a dinawat dagiti opisial ti pananggundaway koma dagiti umili kadagiti amin a serbisio nga ipapaay ti KAPITOL idinto a personal nga inammoda dagiti dadduma pay a kasapulan dagiti umili para iti madagdagus a pannakaaksionna.#