KAPITOL Outreach Program, naidanon iti sabali pay nga upland town

(Danny Antalan/Mancielito S. Tacadena)

GALIMUYOD, Ilocos Sur – Dimmanon dagiti empledo ti kapitolio ken representante dagiti nadumaduma a national line agencies ditoy nga ili idi Nobiembre 3 tapno idanonda dagiti agduduma a kasapulan dagiti duapulo ket maysa a barangay babaen ti Kakailian nga Agnaed iti Probinsia ti Ilocos Sur Idanonmi ti Tulong ken serbisio, aniaman nga Oras dita Lugaryo (KAPITOL Outreach Program).

Addaan ti nasao a programa iti nadumaduma a paset. Umuna, ti medical ken dental mission a no sadino a mataming dagiti sagubanit dagiti umili babaen kadagiti doktor manipud kadagiti district hospitals ken sumagmamano a volunteer doctors ken pannakaipaay ti libre nga agas depende iti kasapulan dagiti lumugar; maikadua, ti pannakaipaay dagiti agduduma a serbisio dagiti national line agencies ken pannakasungbat dagiti parikut dagiti umili mainaig iti concerned agencies; maikatlo, ti pannakaisayangkat ti seminar ken workshops kadagiti barangay officials, barangay treasurer, secretary, barangay tanod, lupong tagapamayapa, BHW, BNS ken dadduma pay a mangidaulo iti barangay; ken maikapat, ti pannakaiyawat kadagiti requests ti tunggal barangay.

Inawat dagiti duapulo ket uppat a barangay daytoy nga ili dagiti nadumaduma a ramit- talon a pakairamanan ti maysa a corn sheller, 8 kuliglig, 2  power sprayer, 1 knapsack sprayer, 3  diket/niog grinder, 1 rice thresher with blower, 2 gasoline water pumps, 9 diesel water pumps, 2 a two-horse power nga electric water pump, 11 a rolio a hose, 13 grasscutter, 1 stainless water tank ken G.I Pipes.

Naikkan met iti wheelchair ken sarukod dagiti agkasapulan nga umili, monoblock a tugaw ken lamisaan ken tseke a sag-P5,000 tunggal barangay.

Mismo a da Gov. Luis “Chavit” Singson ken Bise Gobernador Deogracias Victor Savellano ti nangiyawat kadagiti ramit bayat ti programa.

Agpada a dinawat dagiti opisial ti pananggundaway dagiti umili kadagiti amin a serbisio nga ipapaay ti KAPITOL idinto a personal nga inammoda dagiti dadduma pay a kasapulan dagiti umili para iti madagdagus a pannakaaksionna.

Nairugi idi Setiembre 14, immuna a dimmanon ti grupo ti KAPITOL sadiay ili ti Salcedo.#