KAPITOL Outreach Program, naidanon iti Salcedo

SALCEDO, Ilocos Sur – Dimmanon dagiti empleado ti kapitolio ken representante dagiti nadumaduma a National Line Agencies iti ili a Salcedo idi Setiembre 14 tapno idanonda dagiti agduduma a kasapulan dagiti duapulo ket maysa a barangay babaen ti Kakailian nga Agnaed iti Probinsia ti Ilocos Sur Idanonmi ti Tulong ken serbisio, aniaman nga Oras dita Lugaryo wenno KAPITOL Outreach Program.

Kinuna ni Vice Gov. Deogracias Victor “DV” Savellano iti interbio ti media kenkuana bayat ti pannakaisayangkat ti outreach program nga addaan daytoy iti nadumaduma a paset kas iti umuna: medical ken dental mission a no sadino a mataming dagiti sagubanit dagiti umili babaen kadagiti doktor manipud kadagiti district hospitals ken sumagmamano a volunteer doctors ken pannakaipaay ti libre nga agas depende iti kasapulan dagiti lumugar; maikadua: ti pannakaipaay dagiti agduduma a serbisio dagiti national line agencies ken pannakasungbat dagiti parikut dagiti umili mainaig iti concerned agencies; maikatlo: ti pannakaisayangkat iti serminar ken workshops kadagiti barangay officials, barangay treasurer, secretary, barangay tanod, lupong tagapamayapa, BHW, BNS ken dadduma pay a mangidaulo iti barangay; ken maikapat: ti pannakaiyawat kadagiti kiddaw ti tunggal barangay.

Bayat ti outreach program, naited ditoy nga ili ti dua a kuliglig, 4 a grasscutters, 5 a diesel pumps, 6 a jetmatic, 1 a threaser with blower, 3 a diket/coco grinder, 150 bags a semento, 20 piraso a G.I. sheets, agduduma ti sukatna a hose ken tubo, monoblock tables and chairs.

Naiwaras pay ti Philhealth cards ken financial assistance para kadagiti barangay.

Kinuna pay ti bise gobernador a nabaliwan laeng ti nagan ti programa ta kas met laeng daytoy iti daydi KABSAT Outreach Program a nairugi idi 2007.

“No adda man dagiti saan idi a naipaay ti KABSAT,  adtoyen nga ipaay ti KAPITOL” kinuna ni Savellano.

Nupay saan a nakadar-ay ni Gov. Chavit Singson gapu ta nairana a makimitmiting ken  ni DILG Sec. Jessie Robredo, kinasaritana dagiti taga-Salcedo babaen ti video conference. Dinamag ti gobernador no ania ti pagkurangan dagiti naipaay tapno madagdagus a maipaay.#