Kapolisan, ad-adda pay a pinaingetanna kampaniana kontra loose firearms

SALCEDO, Ilocos Sur – Sumagmamano a paltog ti naisuko iti kapolisan kas paset ti naing-inget a kampaniana maikontra iti agraira a paltog iti probinsia a pakairamanan daytoy nga ili.

Idi Abril 8, maysa a homemade rifle cal. 22 Armscor nga addaan magasin ken 14 a bala ti insuko da Maligcong Barangay Kagawad Leonardo Eblogen y Batore, 54, ken dati nga ABC Federation President Ernesto Cottong, Sr. iti police station ditoy nga ili.

Mapapati a nakita ni Eblogen ti nasao a paltog iti maysa a kalapaw sadiay Barangay Sorioan, Salcedo, Ilocos Sur.

Idi agarup 11:00 ti aldaw ti daytoy nga aldaw, boluntario met nga insuko ni Rolando Cabaya, residente iti Barangay Lungog, Narvacan, Ilocos Sur ti maysa a gauge-12 shotgun nga awanan marka kada COP Rex Balanban Buyucan, Barangay Captain Elmer Cauton, Barangay Kagawad Arsenio T. Carasi ken dagiti sumagmamano a tanod.

Adda itan ti paltog iti kustodia ti Narvacan police station kalpasan a nadokumento daytoy.

Kabayatanna, adda latta dagiti naireport a tattao a natured nga agikuyog iti paltog iti ruar iti balayda uray adda kampania maikontra iti panagraira iti paltog.

Idi rabii ti Abril 9, maysa a homemade gauge 12 buckshot nga awanan marka ken addaan maysa bala ti narekobre dagiti polis iti sango ti DIY Shop iti Quezon Avenue, Barangay 1, Vigan City.

Nagresponde dagiti polis idi nakaawatda iti report manipud iti maysa a di nagpabigbig a residente nga adda nakitana nga armado a tattao iti nadakamat a lugar.

Nagtaray dagiti di nabigbig a suspek idi nakitada dagiti polis ket nabatida ti paltogda.

Naipan ti paltog iti police station para iti umisu a disposision.

Kabayatanna, idi Abril 6, bayat ti panagpatroliada, nakakumpiska iti cal. 45 pistol Armscor nga addaan magasin ken 5 a bala da POI Arthur Adversalo, Jr., miembro ti RPSA a nakadetalye iti Magsingal ken PO1 Gedy Aquino Pilien, polis-Magsingal manipud ken ni Frederick Brillantes y Pacleb, 22, naasawaan., residente iti San Basilio Magsingal.

Sinita dagiti dua ni Brillantes, nakalista a drug user, idi nakitada ti nagtammukol iti siket daytoy. Kinumpiskada ti paltog idi awan ti maipakita ti suspek a dokumento nga autorisado nga agikut iti daytoy.

Iti panagsukimatda no adda pay sabali nga armas ti suspek, nakaduktal pay dagiti polis iti dua a disposable lighter nga addaan iti dagum iti tubo a pagruaran iti gas.

Napilaan ni Brillantes iti panaglabsing iti RA 10591 ken Section 12 ti RA 9165 iti Regional Trial Court, Branch 24, Cabugao, Ilocos Sur ket nai-docket dagitoy iti babaen ti CC No. 3093-K ken 3094-K idinto a nairekomenda nga agpiansa iti P80,000.00 ken P60,000.00 mainaig iti dua a kasona.

Iti kaudian a damag,  naipanen ni Brillantes iti provincial jail ti Vigan City babaen ti commitment order nga inyisio ni Judge Nida Bringas Alejandro a napetsaan iti Abril 8, 2014.#