Kapolisan, inikkatda ti busal ti paltogda

VIGAN CITY – Naggigiddan nga inikkat dagiti polis ditoy probinsia ti busal ti paltogda maysa nga aldaw kalpasan ti isasangbay ti baro a tawen.

Maipalagip a naputipotan iti tape ti murdong ti paltog dagiti polis kas paset ti kampania a malapdan ti panagpaputok iti paskua ken baro a tawen.

Nupay kasta, ditoy Ilocos Sur, adda latta dagiti naireport nga insidente ti panagpaputok manipud kadagiti iresponsible nga agikut iti paltog.

Ditoy Vigan, dua a balay, maysa a panganan, ken kuarto ti maysa nga on-duty a doktor iti ospital ti nakasarakan iti stray bullet. Nagtaud amin dagitoy iti 9 mm. Ngem saan pay nga ammo no asino dagiti nagpaputok.

Pagsayaatanna ta awan ti nagbalin a biktima ti stray bullet, saan a kas iti napasamak idi isasangbay ti baro a tawen idi 2013.#