Kapolisan iti Region I, full alert iti Balik-Eskwela 2011

CAMP BGEN OSCAR M FLORENDO – Naka-full alert amin dagiti police units iti babaen ti hurisdiksionna iti panaglulukat ti klase itay Hunio 6.

Kinuna ni Police Chief Supt. Franklin Jesus B. Bucayu, Police Regional Office 1  director, a pinaingetanna ti police visibility iti panagsubli dagiti  estudiante iti Rehion I a sumrek kadagiti pagadalan tapno maipatalged ti seguridad dagitoy manipud kadagiti kriminal nga elemento kas kadagiti agdudukot, agsisibbarut, swindlers, aglaklako iti droga ken uray dagiti napegges ti panagpatarayna a motorista.

Mapattapatta a nasurok a maysa a milion dagiti estudiante a simrek kadagiti nadumaduma a pagadalan iti Rehion itay Hunio 6.

Immun-una ngem daytoy, imbaskag ti PRO1 dagiti planona para iti seguridad ken karadkad ti publiko pakainaigan iti panaglulukat dagiti pagadalan ken naibilin kadagiti adda ti babaen ti nasao nga opisina a mangisaganada iti bukodda a plano nga iyimplimentarda.

Babaen iti daytoy, naipasiguro dagiti police units ti kinasagana ti operasionda nga agresponde kadagiti problema iti urnos ken talna, pakairamanan ti pammutbuteng manipud kadagiti dakes nga elemento a manggundaway iti situasion.

Naipasdek pay dagiti police assistance desks kadagiti strategic a lugar babaen ti puntiria a “zero crime incidence iti amin a lugar dagiti  pagadalan ken unibersidad.

Naaramat pay ti Police Integrated Patrol System (PIPS) a pakairamanan ti pannakaipatulod ti foot ken mobile patrol personnel iti asideg dagiti pagadalan ken dadduma a lugar a pagdudupudopan dagiti tattao ken nasiputan dagiti kriminal iti kalkalsada a sumrek iti ranggo dagiti estudiante malaksid laeng ti panangisayangkatda kadagiti operasion ti pannakamanehar ti trapiko iti arubayan dagiti pagadalan.

Nabilin pay dagiti police units a makikoordinar a nainget kadagiti administrador dagiti pagadalan ken dagiti opisial  kadagiti bukodda a lugar tapno masigurado ti karadkad ken seguridad dagiti estudiante.

Nagiwaras pay ti PRO1 kadagiti safety tips kadagiti estudiante ken iti publiko a makatulong kadakuada tapno saanda a mabiktima dagiti kriminal nga elemento bayat ti panaglulukat dagiti klase.#