Footer

Kapolisan iti Vigan City, agkurang ti armasda

VIGAN CITY – Agkurkurang ti armas dagiti polis iti panangtagibenda iti urnos ken talna ditoy isut gapuna a kasapulan a gumatang ti gobierno ti siudad iti 15 a paltog.

Iti indatag ni Konsehal George Villanueva a resolusion, dinakamatna a kasapulan a gumatang ti city government iti paltog nga aramaten dagiti polis  gapu iti panangpasubli ti PNP provincial office dagiti naited a long firearms iti police department ditoy.

Naidawat pay bayat ti session a mapagpapatangan kas urgent ti nasao a resolusion nga inlungalong ni Villanueva ken co-author ni Vice Mayor Franz Ranches.

Sagudayen ti resolusion ti pannakagatang iti kabiitan a tiempo ti 2 a units ti shotgun-M30SAS, 10 units shotgun-M30k competition, 2 units shotgun-M30BG ken 1 a rifle M20P tapno masulnitan dagiti naisubli nga armas iti provincial police office.

Idi dinamag ni Konsehal Hermenegildo Apelin no adda problema iti urnos ken talna iti siudad tapno gumatang iti armas ti city government,  insungbat da Villanueva a maysa daytoy a panagannad ken panagsagana tapno mabantayan ti seguridad dagiti agindeg iti siudad ken dagiti bisita.

Inkalintegan dagiti proponent nga adda karbengan ti sangguniang panlungsod a mangaprobar iti nasao a resolusion para iti pagsayaatan ti linak ken talna iti siudad, kas nailanad iti R.A. 8988 Section D ti Vigan City Charter.

Kiniddaw met ni Konsehal BenjoVerzosa ti pannakapaayab ni Chief of Police P/Chief  Inspector Maximo Taclas ngem saan a nakadar-ay daytoy.

Nupay kasta, kalpasan ti deliberasion,  naaprobaran ti resolusion iti maikadua ken pinal a pannakaibasana iti konseho.#