Footer

Kapolisan, nakasaganan iti barangay, SK elections: provincial director

BANTAY, Ilocos Sur – Nakasaganan ti kapolisan para iti maisayangkat a barangay ken sangguniang kabataan elections inton Oktubre 29.

Daytoy ti impasingked ni PNP Provincial Director Police Senior Supt. Virgilio Fabros kabayatan ti Talakayan Sa Isyung Pulis (TSIP) a naangay iti Camp Elpidio Quirino ditoy itay nabiit.

Kinuna ni Fabros nga addan nabukel a safety plan ti PNP para iti pannakatagiben ti natalna nga eleksion kadagiti 768 a barbarangay ditoy Ilocos Sur.

Kanaig daytoy, kinuna ni Fabros a tallo a checkpoints ti maipasdek iti Sinait, Narvacan ken Tagudin tapno mapapigsa ti police visibility iti probinsia.

Beinte kuatro oras nga agbantay dagiti polis kadagitoy a checkpoints a naipasdek itay Setiembre 29, aldaw a panagipilaan iti kandidatura dagiti agngayangay para barangay ken SK positions.

Kinuna ti provincial director a nupay awan dagiti makuna a "hot spots" a barangay iti probinsia, narigrigat a bantayan ti eleksion gapu ta agkakabarangayan ken agkakabagian dagiti aglalaban.

Kinunana a maipangpangruna a kitaen ti kapolisan dagiti barangay kadagiti upland towns tapno malapdan ti ania man a dakes a plano dagiti local terrorists.

Innayonna a madama ti pannakaklasipika dagiti barangay ket maikkan iti naan-anay nga atension dagiti barangay nga addaan insurgency citings.

Kinuna ni Fabros nga istrikto nga ipakatda ti gun ban a nangrugi itay Setiembre 29. Agpatingga ti gun inton  November 13. 

Sagudayen ti linteg a maiparit iti asinoman ti agikuyog iti paltog iti ruar ti pagtaenganna uray lisensiado daytoy no awan ti pammalubos ti Commission on Elections. (Jane Ballad)