Kapolisan ti Ilocos Sur, agkurkurang ti paltogda

BANTAY, Ilocos Sur – Mangnamnama ti Police Provincial Office ti Ilocos Sur nga adda maited ti administrasion Aquino a nayon nga armas dagiti polis ditoy probinsia.

Segun ken ni Police Supt. Cornelio Comila, Deputy Provincial Director for Operations, adda pagkurangan ti service firearms dagiti polis ditoy Ilocos Sur.

Maipalagip nga iti naglabas nga State of the Nation Address ni Presidente Benigno Aquino III, inkarina a gumatang ti PNP iti baro nga armas para kadagiti miembrona.

Kinuna ni Comila nga iti agdama, saan nga amin a polis ket adda naiyisio a service firearmna ket adda dagiti pulis a mangus-usar iti pinalisensiaanda a personalda a paltog.

Kabayatanna, impakaammo ni Comila a maisaysayangkat ti inspeksion kadagiti nagduduma  a police stations kas panagsaganada iti national  inspection nga isayangkat mismo ti national headquarters.  Karaman kadagiti sukimaten ti PPO dagiti records ken ti pannakaipakat ti umisu a panagkawes dagiti polis.#