BANNER: Kapolisan ti Region 1, nakasaganan para SAFE 2016; 201 armas, nakumpiska iti implementasion ti gun ban

CAMP BGEN OSCAR M FLORENDO – Nakasaganan ti Police Regional Office 1 a mangprotehir iti secure and fair elections (SAFE) 2016 a maangay inton Mayo 9, daytoy ti impasingked ni PRO1 Regional Director Ericson T. Velasquez itay nabiit.

Kinuna ni Velasquez a naibaskagen dagiti kasapulan a preparasion iti seguridad ken plano ti deployment babaen iti koordinasion manipud kadagiti counterparts ti Armed Forces of the Philippines kasta met a naisaganan dagiti precautionary measures nangruna kadagiti lugar nga adda iti babaen ti election watchlist areas (EWAs).

Innayonna a naikabilen iti tumutop a lugar dagiti ekuipo ken dadduma a kasapulan ti lohistika, kasta met dagiti kanayonan a polis manipud iti PRO1 regional headquarters a pakairamanan dagiti agdama nga agbasbasa ken Public Safety Field Training Program (PSFTP) a nakaistambay para iti deploymentda.

Agdagup iti 900 a personnel ti naglasat iti pre-deployment orientation seminar (PDOS) ket maibaonto dagitoy kadagiti sentro ti pagbutosan inton Mayo 2. Naisayangkat met ti simulation exercises iti nadumaduma a tukad kadagiti police stations.

Innayon ni Velasquez nga awan ti sabali a tarigagay dagiti kailian no di ti makabutos a nasayud ken natalna idinto nga indagadagna kadagiti umili ti kooperasionda ken tulong tapno mapagtalinaed ti talna iti masungad nga eleksion.

Kabayatanna, inreport ti PRO1 nga aganay 201 nga assorted nga armas ti nakumpiska idinto a 273 a tattao ti inaresto dagiti polis kas panangipakatda iti estrikto ken nainget nga implementasion ti gun ban kas imbilin ti Commission on Elections manipud pay idi Enero 10.

Kinuna ni Velasquez nga iti kadagupan a 201 a nakumpiska nga armas, agdagup iti 70 ti high powered firearms idinto a l31 dagiti low powered firearms.

Iti pakabuklan a 273 a naaresto a tattao, 257 kadagitoy ti sibilian, 2 ti PNP member, 10 ti empleado ti gobierno, ken 4 dagiti security guards a natiliwan a nagikut iti paltog, replika ti paltog, eksplosibo ken patadem.

Kas maibatay iti rekord, 123 ti naaresto iti Pangasinan, 49 iti La Union, 35 iti Ilocos Sur ken 50 iti Ilocos Norte.#