Kapolisan, timmulong iti Brigada Eskwela

MAGSINGAL, Ilocos Sur – Timmulong dagiti polis ditoy nga ili iti Brigada Eskwela nga insayangkat ti Department of Education kas panagsagana dagiti pagadalan iti panaglulukat ti klase.

Segun ken ni Police Inspector Andrew Rabang, hepe ti polis ditoy, boluntrio a timmulong dagiti pannakabagi ti linteg nga adda iti babaenna kadagiti mangisursuro ken nagannak a nagdalus, nagpinta, nagtarimaan, ken dadduma pay a trabaho kadagiti pagadalan ditoy nga ili, nangruna dagiti adda iti poblacion area.

Isaysayangkat ti DepEd ti Brigada Eskwela iti makalawas nangrugi idi Mayo 21 agingga iti Mayo 25 tapno maisagana dagiti pagadalan para iti panaglulukat dagiti klase.

Iti napalpalabas a tawen, agdalus pay nga umuna dagiti agbasbasa ken mangisursuro kadagiti kuartoda iti umuna nga aldaw ti klase ngem babaen ti Brigada Eskuwela, agklasen a dagus dagiti agbasbasa agsipud ta naisaganan dagiti pagadalan sakbayna.#