Kappia, intanggaya ti Army kadagiti rebelde

TABUK CITY, Kalinga – Intanggaya ti Army a nakabase ditoy a probinsia ti kappia kadagiti rebelde kas paset ti addang ti gobierno nga aggibusen ti problema ti insurhensia iti Kalinga.

Intanggaya daytoy ni Army 501st Brigade Commander Col. Roger Salvador iti naangay a  turn-over ceremony bayat ti Gun for Peace Program idinto a kinunana a sidadaan ti Army a mangipakni kadagiti bala ken mangsalaknib iti biag iti counter-insurgency nga operasionna kas paset ti Comprehensive Local Integration Program (CLIP).

Kas kaappeng iti peace offer,  agballigikami iti pannakirupak dagiti soldadomi nga uray awan ti maiputok a maysa a kanalbuong,” kinuna ni Salvador.

Kinuna ni Salvador a mamati a magun-odda ti balligi iti rupak maikontra iti insurhensia saan laeng babaen iti armado nga engkuentro kadagiti kabusor idinto nga inyunay-unayna ti panangpasublida iti panagtalek dagiti rebelde iti gobierno.

Iti babaen ti Gun for Peace Program, ipaayan ti gobierno iti pinansial nga insentibo dagiti dati a rebelde a mangisuko kadagiti aramas ken agsubli iti ikub ti linteg.

Bayat ti seremonia, inyawat ni Salvador ti dua a tseke nga aggatad tunggal maysa iti P40,000.00 para kadagiti dua a dati a rebelde a naintegrar iti Army nga aramaten ti pamiliada a kas seed capital iti irugida a  proyektoda iti livelihood.

Intanggaya ni Salvador daytoy met laeng a peace offer kadagiti “kakabsat iti bantay” ket inawisda ida a bumaba ken mangrugi iti natalna a biag iti ikub iti mainstream a sosiedad. (Manipud iti report ni Larry T. Lopez, PIA CAR, Kalinga)