Kararag: pribado A pannakisarita iti Dios

Komentario ni Christine Marie R. Verzos

 

Maysa a pribado a konbersasion ti panagkararag.  Maysa nga eksklusibo ken naimpusuan a pannakisao wenno pannakisarita ti tao iti Dios. Iti pannakisarita ti tao iti Dios, saan laeng a daydiay agdawat iti aramidenna – ta dumteng met ti pannakasusungeg iti uray asinoman no sa la am-ammo ti maysa a tao no agkasapulan wenno agparikut, lalo no nadagsen unay ti parikutna.

Ngem no saan a makarikna ti tao iti nadagsen wenno awan ti inna pakarikutan ken nawaya ti inna aangsan, dina man la mapanunot ti agyaman iti Dios iti laklak-amenna a nam-ay ken pia. Dina man la ammo a kablaawan ti Dios iti naimbag a bigat no daytay makariing iti narnekan a turogna iti agpatnag wenno di man la tumaliaw nga umisem wenno tumangad a mangiyarasaas ti “hi!” uray no iti panunotna laeng.

Ti panagkararag ket pribado a pannakisarita ti tao iti Dios. Ngem kasano ngarud a masinuo a konbersasion ti dua a tao dayta – nga agpaay laeng kenka ken iti Namarsua  no samo la malagip ti makipatang iti Dios no adda kasapulam wenno agkiddawka iti tulong? Saan a rumbeng a mapasamak daytoy iti biag ti maysa a pudpudno a Kristiano.

Saan a kastoy ti kaimudingan ti kinapudno. Ti pannakisarita iti Dios ket adda kabuligna nga aksion wenno aramid.

Nasken ti panagtignay. Aggunay a kas iti panagtedted dagiti ling-etmo. Saan ket nga agtignay a kas iti panagtignay ni Juan Tamad a nakadata iti sirok ti bayyabas ken nakanganga lattan a mangur-uray a matnag ti naluom a bunga iti ngiwatna. Saan a kasta ti pudno a sumursurot ken Apo Jesus iti dana ti biag.

Tulongan ti Dios ti tao nga ammona a tulongan ti bukodna a bagi.

Por ehemplo, amangan no kunaem: Apo, awan manen kuartak. Tulongannak kadi, pangaasim…

Amangan no dinaka pay talliawen ti Dios no kasta ti mapasamak. Saan a maipangag ti unnoymo wenno inka inkararag, siempre! Ta apay?

Awan kuartak kunam? Kasano koma nga awan kuartam no dika met agtrabaho! Nagdakkelanka a karne ngem dimo man la watwaten dagita ipalpalastogmo a masmasel. Agdependeka lattan kadagiti dadakkelmo. Dawat ditoy, dawat dita. Gastos ditoy, gastos dita. Happy go lucky. Dimo pay ammo ti tumulong. Idi nauman dagiti dadakkelmo iti aramidmo ken ugalim a Juan Tamad style, malagipmo metten ti Dios a Mannakabalin ti amin. Malagipmon ti agkararag. Ti dumawat iti tulong.

Aba, masemsemto pay dagiti dadakkel kenka iti kina-Juan Tamadmo,  anianto la ketdin ti sabali?

Tulongan ti Dios ti tao a mangtulong iti bagina. Ngem ad-adda met ti inka isasango iti pagsiatan ngem ti pagsayaatam. Ti panagugmokmo kadagiti agsasamusam a bisyo imbes a pasin-awem nga inaldaw-aldaw ti linaon wenno nagyan dayta pusom. Imbes a nakakukotka a nakakumot, apay a dimo iyunnat dagita imam ken iyabrasam kadagiti agkasapulan? Ammom aya, no iti masungad nga aldaw ket sikanto met ti makasapul iti tulong? Ken adu pay a bambanag a saanen a nasken nga inaganan. Sumagmamano laeng ti imbagami nga ehemplo a rumbeng a pakakumikuman ti pudpudno a Kristiano.

Ti panagkararag ket pribado a pannakisarita. Saan laeng a ti tao ti agsasao wenno agak-akem itoy. Uray met ti Dios a Mannakabalin amin. Agsao met iti inka panangiyebkas ti linaon dayta pusom wenno kapanunotam. Agsao babaen ti Espiritu Santo a mangtultulong iti asinoman a magmagna iti dana ti biag. Babaen ti Espiritu Santo maidanon kadatayo ti grasia ken unnoytayo Kenkuana. Ti Espiritu Santo ket isu met laeng ti Dios.

Ammo ti Mannakabalin a Dios amin dagiti kasapulam iti inaldaw-aldaw ta saanna nga inyadayo ti imatangna kadagiti pinarsuana. Saannatayo a baybay-an. No adda man  mapukaw wenno maiyaw-awan, inna sapulen ken isubli iti kaitutopanna a minuyongan.

Intay koma ikararag a sipupuso ti intay panagyaman kadagiti parabur a dimteng iti biagtayo, iti pamilia, kadagiti amin a kabagian, iti amin a gagayyem, iti komunidad a yanmo, iti amin amin a lugar. Saan met a liplipatan nga ikararagan dagiti masaksakit, dagiti biktima ti trahedia ken kinaawan ti hustisia, dagiti mairurumen ken agsagsagaba iti saan a panagpapada, dagiti agtutuok iti kasasaadda iti biag – iti ababa a pannao, dagiti pudpudno nga agkasapulan iti pannakaibabaet babaen iti kararag.

Ibabaet ida ta kasta la ngarud ti kararag, maysa a pribado a pannakisarita iti nagbaetan ti Dios ken sika. Saanmo unay nga ideldel ti kasapulam a material a banag no di ket ti kasapulan dagiti sabali ti kaskenan, ta ammon ti Dios ti kasapulam iti dayta a pribado a pannakisaritam.#