Karbengan dagiti babbai ken ubbing, agtultuloy a maitandudo

CABUGAO, Ilocos Sur – Agtultuloy ti pannakairakurak dagiti karbengan dagiti babbai ken ubbing tapno maliklikan ti pannakaabusoda.

Kinuna ni SPO1 Aquino a nairut ti pannakikoordinarda iti DSWD agraman iti DOH ken iti LGU tapno maipasagepsep kadagiti asosasion ken umili, nangruna kadagiti agnanaed iti barangay ti pateg ti kalintegan ken karbengan dagiti babbai ken ubbing tapno masursuruanda a mangilaban iti kalinteganda iti naintaknengan a wagas.

Impalgak ni Aquino nga iti masansan nga ipapanda panag-evaluate kadagiti insidente ken kaso pakaseknan ti babbai ken ubbing ket bimmassit ti bilang dagiti biktima ti panagabuso.

Kinuna ni Aquino a kangrunaan nga ipalpalawagda ti maipapan iti RA 9710, RA 9208 ken RA 7192 ken kaarngida a linteg a mangprotehir iti kalintegan dagiti babbai ken ubbing tapno masalaknibanda iti aniaman a pannakaabuso. (Jose Ed. Sajonia)