Banner News: Karbengan dagiti consumers, naidarirag iti Local Price Coordinating Council Congress | Tawid News Magazine - Weekly Ilocos News 📰

Karbengan dagiti consumers, naidarirag iti Local Price Coordinating Council Congress

VIGAN CITY – TAPNO malapdan ti pannakagundaway dagiti consumers iti kalidad ken presio dagiti gatangenda a produkto, nasken ti panangammo ken panangirupirda kadagiti kalinteganda kas sagudayen dagiti naputar a linteg iti Pilipinas.

Dayta ti naidarirag kabayatan ti naangay a “Local Price Coordinating Council Congress” nga inlungalong ti Provincial Office ti Department of Trade and Industry iti panangidaulo ni Ms. Grace Lapastora, Provincial Director. Naangay ti congress sadiay Provincial Capitol idi Oktobre 17, 2019.

Nakikaysa iti pasken dagiti kameng ti Sangguniang Panglalawigan a da Virginia Cordero Pe Benito, Chairperson ti Committee on Trade and Industry iti Provincial Board ken dadduma nga opisial ti Provincial Government, ken dagiti ili ken siudad ti Ilocos Sur. Nagpaay nga speakers iti congress dagiti pannakabagi dagiti nagduduma nga stakeholders ken ahensia ti gobierno a maseknan iti pannakailako kadagiti consumers dagiti nagduduma a produkto.

Iti panagsarita ni SPM Jaime Singson a nangibagi ken ni Gov. Ryan Singson, pinagyamananna ti DTI iti panangiyusuatda iti kongreso tapno mapagtataripnong dagiti pannakabagi dagiti nagduduma nga ahensia ken local government units para ti pannakaitandudo ti pagsayaatan dagiti consumers.

Sinalaysayna nga iti adun a tawenna kas Board Member ket addan tallo a daras nga indeklararda ti Ilocos Sur nga “under state of calamity” gapu kadagiti napigsa a bagyo a nangdidigra iti probinsia.

Impaganetgetna a kadagita a panawen, saanda a naan-anay a na-monitor no adda dagiti komersiante a nag-over pricing kadagiti tagilakoda a nanggundaway kadagiti umili ken biktima ti kalamidad. Inlawlawagna nga awan dagiti naawatda a report ti over pricing ket saanda a masinunuo no dayta ket bunga ti kinaawan ti negosiante a nagabuso wenno awan ti personnel a nag-monitor kadagiti pagtagilakuan.

Impeksana ti ayatna iti kaadda ti kongreso a mamagkaysa kadagiti nagduduma nga ahensia ken LGU tapno adda katulongan ti Provincial Government nga ag-monitor iti merkado no sumangbay dagiti didigra. Indariragna ti panangitultuloy ti DTI ken dagiti stakeholders ti panagtitinnulongda para ti pagsayaatan dagiti umili a consumers.

Iti met panagsarita ni SPM Efren Rafanan, Chairperson ti Committee on Agriculture, indariragna ti kinapateg ti kongreso tapno mapakaamuan dagiti consumers kadagiti kalinteganda ket saanda a magundawayan no gumatangda kadagiti kasapulanda a produkto.

Impakaammona nga iti agdama ket nagduduma ti pannakagundaway dagiti consumers no gumatangda kadagiti produkto kas ti kaawan ti price tag dagiti tagilako iti tiendaan, sub-standard a landok, peke nga agas ken dadduma pay a produkto.

Nagpalagip pay kadagiti mailaklako a sub-standard a Christmas lights a mabalin a pakaigapuan ti uram. Indariragna a nasken ti pannakayadal dagiti linteg a mangsaluad iti karbengan dagiti consumers tapno saanda a maabuso ken magundawayan.

Iti nagmalem a kongreso, nagsarita dagiti speakers manipud kadagiti nagduduma nga ahensia ken departamento maipapan iti “The Role and Function of the Local Price Coordinating Council; The Role of the Department of Agriculture in Monitoring of Prices of Agricultural Products; The Role of Department of Health in Monitoring Prices of Medicines; The Role of Department of Natural Resources in Monitoring Prices of Lumber; ken The Role of Department of Energy in Monitoring Prices of Gasoline and Other Fuel Products.

Naangay ti workshop ken nangipaay iti report ti Local Price Coordinating Council, ken naipresentar ti Operations Manual para ti LPCC.

Naisayangkat ti congress kas paset ti selebrasion ti Consumers’ Month tapno maitandudo ken masaluadan ti interes dagiti consumers kadagiti managgundaway a komersiante. ●