Karinderia a masuspetsa a front ti prostitusion, naraut

CANDON CITY – Rinaut dagiti pannakabagi ti linteg ti maysa a panganan ditoy a mapapati a parupa ti prostitusion ket inarestoda dagiti akinkukua, ti trabahador ken ti guest relations officer.

Inaresto ti raiding team nga indauluan ni Chief of Police  Chief Inspector Marlo Castillo, da Fernando Doque, 40, akinkukua ti Malou Carinderia ken beer dealer, Malou Belino, 40, makipagtagikua iti establisimento,  Glaiza Magdusa, 26, GRO, agpapada a residente iti San Jose, Candon City, ken Editha Magwilang, 44, para luto ken para innaw,  taga-Tubo, Abra, ket naipanda iti police station para iti interogasion, dokumentasion ken disposision.

Sakbay ti operasion, nagpammarang dagiti  operatiba a kas kustomer ket kinapatangda ni Magwilang a kayatda ti mangiruar iti babai.

Mapapati a pinaayaban ni Magwilang ni Magdusa tapno sumurot iti grupo.

Ngem idi agturongdan iti lodging house ken naipaima kenkuanan ti bayad, mapapati a nakadlaw ti GRO ket nagsanud. Inareston dagiti polis ti GRO.

Naala iti ikut ti GRO ti marked money a P500.00 nga addaan serial number JD 806282.

Mapapati nga awan ti maiparang ni Magdusa a working permit iti panagpaayna a GRO iti nasao a paginuman.

Nainget ti panangiyemplementar ti kapolisan ditoy iti City Ordinance No. 100-2000,  a nangamendar iti Ordinance No. 350 a nangirusat iti kampania maikontra iti prostitusion kadagiti videoke bars iti barangay San Jose, ditoy siudad.#