Karit ken ni Gov. Vilma Santos

Kasapulan kadi unay dagiti agtuturaytayo ti kuarta a busbosen dagiti turista iti panagpallailangda ditoy pagilian tapno dumur-as iti ekonomia uray iti sanguanan ti pannakaiwalin dagiti masalapon nga umili?

 Alaentayo a pagarigan ti plano ti maysa a kompania ti Koreano a mangipatakder iti health spa resort iti wangawangan ti crater ti Taal Volcano.

Kangrunaan a puntiria ti pannakaipasdek ti nasao a resort iti Taal Volcano dagiti turista a mapan agpallailang ken agdigos iti pamudoten a danum a patien daytoy a kompania a makapaimbag iti an-annayen ti bagi ken mangpasayaat iti salun-at dagiti mapan agdigos ken iti panagakupna iti pirak iti panagdadarison dagitoy a turista iti ipasdekna nga spa resort.

Iti umuna a panagkita, napintas daytoy a proyekto. Makaawis la ketdi kadagiti naruay a turista a mapan agpallailang wenno sumarungkar iti daytoy kabassitan nga aktibo a bulkan iti lubong.

Dakkel ti potensialna a pamastrekan isu nga nga inyendorso dagiti lokal nga opisial ti ili a makinsakup iti Taal ken iti Department of Tourism ti pannakaipasdek ti health spa iti asideg ti crater ti Taal Volcano. Iti met biang ti Department of Environment and Natural Resources nasurot amin ti nasao a kompania dagiti kasapulan isu nga inikkanda iti  environmental compliance certificate. Saanda a nakita wenno dida kayat a kitaen nga adda dagiti madangranan ken iti peggad a pakaipasungalngalan  dagiti turista iti pannakaipasdek ti nasao nga spa resort iti wangawangan ti bulkan.

Kontra dagiti mangngalap, mannalon ken dagiti agnaed iti aglawlaw ti bolkano ti pannakaipasdek iti health spa resort iti Taal Volcano agsipud ta mapadisida iti pagtaengan ken pagsapulanda.

Maseknan ditoy ti nasurok a 6,000 a residente iti aglawlaw ti Taal Volcano a saklawen dagiti rinibu nga ektaria a pagtaltalonan ken pagkalapan a maapektaran iti pannakaipasdek dagiti inprastruktura ken patakder para iti nasao a health spa.

Kontra met ti Philippine Institute of Volcanology and Seismology agsipud ta aktibo a bulkan ti Taal ket permanente a peligroso a lugar a mangted iti risgo kadagiti agdagus a turista.

Iti ababa a pannao, napeggad ti agtaeng uray maysa laeng nga aldaw iti wangawangan ti nasao a bulkano.

Madakamat pay ditoy a maibilang a protektado a lugar ti Taal Volcano agsipud ta naituding a nasional a parke.

Ti saludsod: ania ti napatpateg, dagiti turista a nagimet iti kuarta a busbosenda iti panagpallailangda wenno dagiti mangngalap, mannalon ken dagiti lokal nga agnaed iti aglawlaw ti Taal Volcano?

Di pay napudotan iti tugawna ni Gov. Vilma Santos ket maisaangen iti napudot nga isyo a mangkarit iti lideratona a kas salaknib dagiti marigrigat a kailianna. Masipsiputan ngarud ti aniaman a desisionna iti daytoy nga isyo.#