Karkarintenda kadi ti Simbaan Katolika?

Komentario ni Danilo Antalan

 

 

Umuna, ti panakaipasa kas maysa a linteg ti Reproductive Health Bill wenno ad-adda nga ammo kas RH Bill.

Kasta la unay ti panangikampania ti Simbaan Katolika iti pannakaibasura koma daytoy a gakat ta saan a maiyannurot iti adal ti simbaan.  Naaramid ti nadumaduma a protesta, rally, nairaman pay daytoy a kampaniada iti sermon bayat iti misa, ken uray payen iti Holy Rosary tunggal alas-6 ti malem.

Ngem awan nagmaayanna, naaprobaran ti nasao a gakat iti kongreso, iti senado, sa idi kuan iti bicameral committee.  Nagngudo daytoy iti panangpirma ni Presidente Noynoy kas maysan a linteg.

Awan naaramidan ti naduma-duma a kalikagum, pannakisarita, lobby, ken uray payen ti panangibaga iti saan a panangbutos kadagiti mangsuporta itoy a gakat.

Sa idi kuan, rimmuar manen ti sayangguseng ti pannakailukat manen iti saritaan ti pannakabiag ti Divorce Bill.  Manen, insigida a nagtimek ti Simbaan Katolika a saanda pabor itoy a linteg ta daytoy ket mangilungalong iti pannakarakrak ti pamilia.

Kalikakgum ti Divorce bill a maisubli tapno dagiti nagkasar iti simbaan, hues ken mayor ket mapawaswasda ti bileg ti maikapito a sakramento gapu iti nadumaduma a rason:  kas koma ta didan agdendenna, saanda nga agkinnasurotanen nga agasawa, nalabes a panangpaspasakit iti asawa ken dadduma pay.

No mapagbalin daytoy a linteg, mabalinen dagiti agasawa nga agsina no mapaneknekan dagiti rasonda a saandan a rebbeng nga agtipon pay.  Amang a nalaklaka a wagas, iti pinansial ken proseso, no ikumpara iti annulment hearing nga isayangkat ti korte tapno laeng mawaswas ti bileg ti kasarda.

Saritaan pay laeng daytoy a banag isu a di pay ammo no ania ti pagbanaganna, no maituloy daytoy wenno saan.  Kasla mangal-ala pay laeng iti opinion kadagiti pumabor ken saan.  Isut gapuna a tunggal maysa ket nangiwaragawagen iti pagtaktakderanna.

Sa ita manen, bibiagenda manen ti death penalty law.  Apagserrek ti tawen, rimmuar iti damag nga adalenda manen daytoy a linteg gapu kadagiti nagkaadu a mapaspasamak a kriminalidad iti sangkapagilianan.  Adu dagiti mapaspasamak a pammapatay, panagrames, panagtakaw, kidnap ken dadduma pay ditan agsipud ta awan metten ti kabutengda a linteg—ta no kas pangarigan matiliwda, mabaludda laeng iti tungpal biag, ken mabalin pay a maikkanda iti parole tapno mawayawayaanda met laeng.

Nabayag a natayen daytoy a linteg, naikuyog a natay iti pannakatay ti naudi a nakayemplementaranna a ni Leo Echegaray idi dekada nobenta.

Ngem ita, kayatda nga agungar manen.  Ket agsipud ta manggudas met iti biag ti maysa a tao, saan ket ngarud a paboran daytoy ti simbaan.

Kadagitoy a paspasamak ditoy pagiliantayo, di kad’ rumrummuar a kasla karkariten ti gobierno ni Pnoy ti simbaan Katoliko babaen kadagiti linteg a supsupiatenda a bibiagen met ti gobierno?

Nairanrana ngata met laeng a dagitoy a linteg ket kayat a biagen ti agdama nga administrasion, nupay dagitoy  ket nabayag met a konkontraen ti simbaan Katoliko, ken uray dagiti dadduma pay a relihion?

Wenno igaggagara ngata ti gobierno?

Umad-adu ti paggidgidiatanda.   Ket ammok, nga uray kadagiti sumaganad nga aldaw, addanto pay dagiti rummuar a banag a saanda pagkinnasurotan.

Mapanpanunotko lang, dumtengto kadi met ti gundaway a mapanunot ti Katolika, a gapu kadagitoy a panakaliplipitda, wenno panagkurang ti tao iti uneg ti gobierno, ket mapilitandanto metten a mangipataray iti maysa nga obispo, wenno padi, wenno indibidual nga adda iti simbaan tapno agkandidato iti maysa a nangato a posision iti gobierno.

Ania a posision?  Senador—Bise Presidente—ken uray payen Presidente!

Tapno iti kasta, adda ti pannakamatada ken muscle ti simbaan, nangruna kadagiti addang a mangdadael, mangkarit ken mangmantsa iti sursuro, doktrina ken uray payen mismo ti estado ti simbaan.  A kas iti panangipalubosen ti council of bishops’ ti Russian Orthodox Church idiay Russia tapno adda mangsalaknib iti simbaanda sadiay.

Posible!  Wen posible.

Timmarayto payen ni Brother Eddie Villanueva.#