Footer

Karpintero, biktima ti hit and run

CABUGAO, Ilocos Sur – Natay iti ospital a nakaitarayanna ti maysa a karpintero a biktima ti hit and run sumagmamano nga oras kalpasan ti pannakasapgid ti naglugananda a motorsiklo iti national highway ti Barangay Bonifacio ditoy nga ili idi rabii ti Mayo 5.

Pimmusay ni Cresencio Valledor y Toquib, 55, naasawaan, karpintero, ken residente iti Barangay Cuancabal, iti Metro Vigan Cooperative Hospital a nakaitarayanna idi parbangon ti Mayo 6 idinto a maag-agasan met iti Pira Clinic and Hospital, Cabugao gapu kadagiti dunorna iti nadumaduma a paset ti bagina ti nagmaneho iti motorsiklo a ni Mariano Siababa y Tomas, 46, residente iti Barangay Baclig ditoy met laeng nga ili .

Tinarayan ti di nabigbig a nagmaneho iti Elf dagiti biktima kalpasan ti aksidente.

Iti inisial a panagimbestiga dagiti polis, agpaabagatan ti Yamaha Jog Scooter a minaneho ni Siababa, kalubbonna ni Valledor ngem idi makadanonda iti sango ti Maja’s Garden a masarakan iti Sitio Cabaroan, Barangay Bonifacio, mapapati nga aksidente a sinapgid ti maysa a nataray ken agobertek a nalabbaga a mini Elf ti luganda a puon ti nakatulidan ti scooter iti highway.#