Karpintero, kinabil dagiti kinainomna

BANTAY, Ilocos Sur – Di panagkinnaawatan bayat panaggiinomda ti ramut ti pannakakabil ti maysa a karpintero sadiay Zone 5, ditoy nga ili idi rabii ti Hunio 6.

Nagpulong iti polis ni Tony Galos y Gaoat, 62, naasawaan, ken residente iti Barangay Dan-ar, Santiago, Ilocos Sur a kinabil dagiti agkabsat nga Allan ken Jomar Ronquillo, agpada a karpintero.

Segun ken ni Galos, naggiinomda iti uneg ti maipatpatakder a pasdek iti abay ti 7/11 Convenience Store idi naparnuay ti nabara a panagsinnungbatda kadagiti suspek.

Napan ni Galos iti kusina, nangala iti botelia ti beer sana imbarsak iti abay dagiti agkabsat a Ronquillo. Dinarup dagiti suspek ti biktima ket idi naipiskutda, pinang-orda iti botelia ti beer.

Nakataray ti biktima ket napan nagpatulong iti polis. Impan dagiti polis ti biktima iti Gabriela Silang General Hospital para iti pannakaagasna.

Naglibas dagiti suspek babaen ti iluluganda iti agpaabagatan a Partas Bus.#