Police Report: Karpintero, nagtakaw agbalor P200,000 nga alahas | Tawid News Magazine - Weekly Ilocos News 📰

Karpintero, nagtakaw agbalor P200,000 nga alahas

Police crime scene

NARVACAN, Ilocos Sur — Maysa a karpintero ti nagtakaw kadagiti alahas iti mismo balay a pagtatrabahoanna.

Segun iti salaysay ni Ruperto Gose y Baldibarona, 71, naasawaan ken residente iti Brgy. Quinarayan Narvacan, Ilocos Sur, idi kano 11:30 iti bigat ti Oktubre 15, daytoy a tawen, nasiputanna ni Nathaniel Bautista y Lazarte, 27, awanan asawa ken residente ti Brgy. Sulvec Narvacan, Ilocos Sur, a nangpuersa a nanglukat iti kabinet iti maysa a siled ti pagtaenganda sana innala dagiti alahas nga agbalor iti Php 200,000.00.

Gapu ta saanen a nagsubli iti trabaho ti suspek aginggana 5:00 iti malem, nagpatulong ti biktima kenni Architect Marlon Martinez a dagus nga inayabanna ti suspek tapno mandaren nga isubli dagiti tinakawna.

Immuna a pinaglibakan ti suspek ti panagtakaw, ngem iti idadateng dagiti kameng ti PNP, inaklonna met laeng ti inaramidna ken kinuyogna pay dagiti polis iti balayda sadiay Brgy Sulvec Narvacan, Ilocos Sur, tapno marekobre dagiti alahas.