Karpintero, nakoriente

BANTAY, Ilocos Sur – Nakoriente ti maysa a karpintero bayat ti panagpalitadana iti kongkreto a diding ti maysa a maar-aramid a pasdek ti ospital a puon ti nakayospitalanna idi malem ti Hulio 5.

Naitaray iti Metro Vigan Cooperative Hospital ni Macario Tolentino y Baldos Jr., 54, naasawaan, kapatas ken residente iti Barangay Ampandula, Santa, Ilocos Sur gapu iti pannakapuor ti nadumaduma a paset ti bagina maigapu iti pannakakorientena.

Segun iti inbestigasion, agpalpalitada ni Tolentino ken ni Richard Borje y Bulseco, 37, naasawaan, ken residente iti Barangay Mabilbila, Santa, Ilocos Sur iti kongkreto a diding ti mapatpatakder a Mini Hospital iti Bantay, Ilocos Sur idi agarup 4:20 ti malem ti Hulio 5 idi aksidente a naiggamanna ti high tension wire ti ISECO.

Iti pannakaisurat daytoy, adda pay laeng ti biktima iti ospital nga agpapaimbag.#